Xorazmda yosh yigit boshqaruvidagi Tracker kanalga quladi 

Xorazm viloyatining Urganch shahrida yosh yigit boshqaruvidagi Tracker mashinasi YTHga uchradi. Bu haqda Kun.uz manbasi xabar berdi.

Ma’lum bo‘lishicha, YTH 30 may kuni sodir bo‘lgan. 2006 yilda tug‘ilgan yigit tengdosh do‘stlarini mindirgan holda Tracker mashinasida katta tezlikda ketayotib, boshqaruvni yo‘qotgan. Buning oqibatida mashina kanalga qulagan. Bu paytda kanalda suv bo‘lmagan.

YTHda mashinada yo‘lovchi sifatida bo‘lgan 2 nafar yigit tan jarohati olib, shifoxonaga yotqizilgan. Ulardan birining onasi Kun.uz’ga murojaat qildi.

“Mashinani boshqargan yigitning haydovchilik guvohnomasi bo‘lmagan. U mashinani yaqinda sotib olgan, hali o‘z nomiga rasmiylashtirib ham olmagan ekan. O‘g‘lim old yo‘lovchi o‘rindig‘ida bo‘lgan. Mashina kanalga qulaganda o‘g‘lim tashqariga otilib chiqib ketgan. Jarohati jiddiy. O‘zim ming xavotirda o‘tirgan bir paytimda mashina boshqaruvida o‘g‘lim bo‘lgani haqida tuhmat qilishmoqda”, deydi ayol.

Uning qo‘shimcha qilishicha, hozirda holat yuzasidan dastlabki tergov harakatlari olib borilmoqda. Mashina boshqaruvida kim bo‘lgani ekspertiza xulosalari bilan aniqlanadi.