16:23 / 11.11.2021
2619
Абдулазиз Комилов Туркий кенгаш Ташқи ишлар вазирлари йиғилишида қатнашмоқда
Фото: ТИВ матбуот хизмати

Ўзбекистон ташқи ишлар вазири Абдулазиз Комилов 11 ноябрь куни Истанбул шаҳрида бошланган Туркий тилли давлатлар ҳамкорлик кенгаши Ташқи ишлар вазирлари кенгаши йиғилишида қатнашмоқда.

Вазирлар учрашувида Туркий кенгашга аъзо давлатлар раҳбарлари иштирокидаги VIII саммитдаги ташкилий масалалар, шунингдек, давлат раҳбарлари томонидан имзоланиши кутилаётган якуний ҳужжатлар ҳамда кун тартибидаги бошқа лойиҳалар муҳокама қилинади.

Туркия ташқи ишлар вазири Мавлуд Човушўғли 10 ноябрь куни Абдулазиз Комилов билан ишчи тушлик доирасида учрашув ўтказганини маълум қилган. Учрашувда икки давлат ўртасидаги иқтисодий-маданий ҳамкорлик ҳамда Афғонистондаги масалалар муҳокама қилинган.

Бугун, 11 ноябрь куни президент Шавкат Мирзиёев Истанбулда ўтказиладиган ушбу кенгашнинг навбатдаги саммитида иштирок этиш учун Туркияга жўнаб кетди.

Президент матбуот хизмати бўлажак олий даражадаги учрашув кун тартибидан кенгаш доирасидаги савдо, инвестициялар, “яшил” иқтисодиёт, рақамли технологиялар, транспорт ва коммуникациялар ва ташкилот фаолиятини янада такомиллаштириш масалалари кўриб чиқилишини хабар қилган эди.

Top