Qashqadaryoda o‘ta og‘ir jinoyatlarni sodir etib qidiruvda bo‘lgan shaxs Toshkent viloyatida qo‘lga olindi

Ma'lum qilinishicha, joriy yil 23 noyabr kuni Toshkent viloyatida o‘tkazilayotgan “Xavfsiz tun”, “Xavfsiz hudud” keng qamrovli profilaktik tadbirlari doirasida O‘rta Chirchiq tumani IIB Huquqbuzarliklar profilaktikasi va jinoyat qidiruv bo‘limi tezkor xodimlari tomonidan bir yildan buyon qidiruvda bo‘lgan shaxs qo‘lga olingan.

1993 yilda tug‘ilgan Sh.Sh. Jinoyat kodeksining 164-moddasi (Bosqinchilik) 3-qismi va 25-moddasi (Jinoyatga tayyorgarlik ko‘rish va jinoyat sodir etishga suiqasd qilish), 97-moddasi (Qasddan odam o‘ldirish) 2-qismi “v”, “d”,“j”, “n”, “o”, “p” bandlarida ko‘rsatilgan jinoyatlarni sodir etib, 15 yil muddatga ozodlikdan mahrum etish jazosi tayinlangan. U 2020 yilning sentyabr oyidan buyon Qashqadaryo viloyati IIB tomonidan qidiruvda bo‘lgan.

Qayd etilishicha, jinoyatchini ushlash vaqtida fuqaro Sh.Sh. qochishga uringan va ichki ishlar organlari xodimlariga bo‘ysunmay, faol qarshilik ko‘rsatgan.

Ma'lumot uchun, Jinoyat kodeksining 97-moddasi (Qasddan odam o‘ldirish) 2-qismi:

• “v” bandi aybdorga ayon bo‘lgan ojiz ahvoldagi shaxsni;
• “d” bandi boshqa shaxslarning hayoti uchun xavfli bo‘lgan usulda;
• “j” bandi o‘ta shafqatsizlik bilan;
• “n” bandi kishi a'zolarini kesib olib, boshqa kishiga ko‘chirish (transplantat) yoki murdaning qismlaridan foydalanish maqsadida;
• “o” bandi boshqa biror jinoyatni yashirish yoki uning sodir etilishini osonlashtirish maqsadida;
• “p” bandi bir guruh shaxslar yoki uyushgan guruh a'zosi tomonidan yoxud o‘sha guruh manfaatlarini ko‘zlagan holda o‘ldirganlikni nazarda tutadi.