Smartavia Sankt-Peterburgdan Buxoro va Namanganga muntazam qatnovlarni yo‘lga qo‘yadi

Smartavia aviakompaniyasi (2019 yilgacha – Nordavia) Peterburgdan Buxoro va Namanganga muntazam reyslarni yo‘lga qo‘ymoqda, deb xabar berdi «Shimoliy poytaxt havo darvozalari» Pulkovo aeroporti boshqaruv kompaniyasi matbuot xizmati.

Foto: planespotters.net /Moritz Klockner

«23 noyabr kuni Pulkovo xalqaro aeroportida Smatavia aviakompaniyasining Buxoroga birinchi muntazam qatnovi amalga oshirildi. Avvalroq aviatashuvchi O‘zbekistonga parvozlarni faqat charter dasturi doirasida amalga oshirgan. 1 dekabrdan Smartavia Sankt-Peterburgdan Namanganga yangi muntazam reyslarni yo‘lga qo‘yadi», deyiladi matbuot xizmati xabarida.

Pulkovodan Buxoroga aviakompaniya har hafta seshanba kunlari parvozlarni amalga oshiradi. Namanganga laynerlar har chorshanba kuni soat 22:10 da uchadi.

1 apreldan Rossiya va O‘zbekiston o‘rtasida muntazam aviaqatnovlar tiklandi. Uzbekistan Airways milliy aviatashuvchisi va «Aeroflot»ning haftada to‘rt martalik muntazam reyslari bilan bir qatorda, ikki davlat o‘rtasida charter reyslari ham amalga oshirila boshlandi.

Avvalroq, O‘zbekistonda yangi aviakompaniya tashkil etilayotgani xabar berilgandi.