Ukraina yana Peterburgga hujum qildi

Ukraina 6 iyunga o‘tar kechasi va ertalab Sankt-Peterburg shahri va Leningrad oblasti bo‘ylab dronlar orqali yopirilma hujum uyushtirdi. Bu hujum Peterburgda xalqaro iqtisodiy forum yopilish kuniga to‘g‘ri keldi; to‘rt kunlik forumda bu shaharga ikkinchi bor dronlar hujumi amalga oshirilishi bo‘ldi.

Sankt-Peterburg gubernatori Aleksandr Beglov ertalabki murojaatida aholini ko‘chaga chiqmaslikka chaqirgan – bunaqasi urush boshidan buyon ilk bor kuzatilmoqda. Bir necha soat o‘tib Beglov hujum qaytarilgani, uch kishi yaralangani haqida hisobot berdi. Shu bilan birga, u havo hujumidan mudofaa tizimlari «jiddiy zarar yetkazilishiga yo‘l qo‘ymagani»ni qayd etgan.

Leningrad oblasti gubernatori Aleksandr Drozdenko esa hudud uzra 144 ta dron urib tushirilganini aytgan. Lomonosov rayonida «mudofaa vazirligi obektida» chiqqan yong‘in tufayli 600 dan ortiq kishi evakuatsiya qilingan, to‘rt kishi, jumladan, bir bola yaralangan.

Rasmiylar aynan qaysi obektlar hujumga uchraganiga aniqlik kiritmagan. Astra telegram-kanali guvohlar tomonidan olingan foto va videolarni tahlil qilib, Kronshtadt dengiz kadetlari harbiy korpusi, suvosti qurollari yaratiladigan Dengiz issiqlik texnikasi ilmiy-tadqiqot instituti, shuningdek, Petergof neft bazasi zarba nishonlari bo‘lgani haqida xulosaga kelgan.

Hujum paytida 45 ming aholiga ega Kronshtadt shahriga (Finn ko‘rfazidagi orolda joylashgan va materik bilan ko‘prik orqali bog‘langan) bir necha soat davomida kirish va chiqish taqiqlandi. Shuningdek, shaharda payshanba kuni boshlangan va yakshanbagacha davom etishi kerak bo‘lgan «Kronshtadt yelkanlari» nomli keng ko‘lamli musiqa va sport festivali ham bekor qilindi.

Ukraina dronlari Sankt-Peterburg shahri va oblastidan tashqari Rossiyaning boshqa regionlariga ham hujum qilgan. RF mudofaa vazirligi 376 ta zarbdor dron yo‘q qilingani haqida hisobot bergan.

Krasnodar o‘lkasidagi zarba Ust-Labinsk neft bazasida yong‘in chiqishiga sabab bo‘lgan, mahalliy rasmiylar atrofdagi uylardan o‘nlab kishilarni evakuatsiya qilgan. Smolenskda dron turar joy binolari o‘rtasida turgan kran minorasiga urilgan. Tver oblastida dron parchalari tushishi oqibatida avtomobil haydovchisi halok bo‘lgan.

Ukraina prezidenti Volodimir Zelenskiy bu zarbalar RF prezidenti Vladimir Putin urushni yakunlash va tinchlik muzokaralari boshlashdan bosh tortishiga javoban berilganini aytdi.

Bu urushni tugatish vaqti keldi. Ammo Rossiya rahbari urushishni xohlaydi. Shu tufayli bu tajovuz uchun Ukraina sanksiyalari amalda. O‘tgan tunda dronlarimiz Sankt-Peterburg regionigacha – dushman dengiz floti arsenallari va Kronshtadtdagi bazagacha bo‘lgan taxminan 1000 kilometr masofani bosib o‘tdi.

Shuningdek, bizning uzoq masofali sanksiyalarimiz Krasnodar o‘lkasigacha 500 kilometr masofani bosib o‘tdi va neft bazasiga zarba berdi. Rossiya o‘z urushini tugatishi va insonlar hayotiga zarba berishni bas qilishi kerak. Ukrainaga nisbatan adolatsizlikning har qanday ko‘rinishiga adolatli javob beriladi.

Zelenskiy bir necha kun oldin Putinga ochiq xat yozib, tinchlik sulhi tuzish hamda betaraf mamlakatlardan birida yuzma-yuz uchrashishni taklif qilgandi. Keyingi kuni Putin hozircha bunday uchrashuv o‘tkazishdan «ma’no ko‘rmayotgani»ni aytib, rossiyalik harbiylarga shunday murojaat qilgandi: «Ishlanglar, og‘aynilar».