08:06 / 04.12.2021
23388
Ўзбекистонлик теннисчи қиз умрбод теннисдан четлатилди

Альбина Хабибулинага теннис бўйича ҳар қандай турнирда қатнашиш ва ташриф буюриш тақиқланди.

Фото: IJIRST

Ўзбекистонлик теннисчи келишилган ўйинларни ташкил қилгани учун бир умрга дисквалификация қилинди.
 
Альбина Хабибулина умрбод теннисдан четлатилди. Бундай қарор Теннисда ҳалолликни таъминлаш халқаро агентлиги томонидан қабул қилинди. 

Қайд этилишича, Хабибулина бир неча бор ўйин қоидаларини бузган, келишилган ўйинлар ташкил қилган.

Спортчига теннис бўйича ҳар қандай турнирда қатнашиш ва ташриф буюриш тақиқланди. Бундан ташқари, у 150 минг доллар жаримага тортилди. 

Фаолияти давомида Хабибулина IFT яккалик баҳсларида 492-ўринни эгаллаган, IFT жуфтлик баҳсларида эса - 208-поғона. 

У 2021 йил 21 ноябрдан бошлаб четлатилди. Спортчи ўзига қўйилган айбловга эътироз билдирмади. Маълум қилинишича, у 20 иш куни ичида Спорт арбитраж судига апелляция бериш ҳуқуқига эга. 

2019 йил сентябр ойида Франция полицияси икки нафар теннисчи - ўзбекистонлик Альбина Хабибулина ва қирғизистонлик Ксения Палкинани қўлга олганди. Ўшанда улар келишилган ўйинларда гумонлангани айтилганди.

Шундан сўнг, Ўзбекистон ташқи ишлар вазирлиги Францияда теннисчи Альбина Хабибулинанинг қўлга олиниши бўйича изоҳ берди. Вазирликда таъкидланишича, Хабибулина 2017 йил августдан бери Ўзбекистон фуқароси ҳисобланмайди.

Top