Isroil bosh vaziri ilk bor BAAga tashrif buyuradi

Isroil bosh vaziri Naftali Bennet BAAga tashrif buyuradi. Bu Isroil bosh vazirlari uchun BAAga tarixdagi birinchi safar bo‘ladi. Bennet 13 dekabrda BAA valiahd shahzodasi Shayx Muhammad bin Zoid Ol Nahayon bilan uchrashadi.

Foto: AP

Bennet va Ol Nahayon Isroil va BAA o‘rtasidagi munosabatlar, Eron bilan bog‘liq vaziyat, ikki davlat o‘rtasida barqarorlik va farovonlikni mustahkamlashga turtki beradigan iqtisodiy va mintaqaviy masalalarni muhokama qilish uchun uchrashadi.

2020 yil avgustda Isroil va BAA AQSh vositachiligida munosabatlarni yaxshilash haqidagi kelishuvni imzolagandi. Unga ko‘ra, o‘zaro elchixonalarni ochishga qaror qilingan, ikki davlat o‘rtasida aviaaloqa o‘rnatilgan, sayyohlik safarlari uyushtirila boshlangan.

Bungacha arab davlatlaridan faqatgina Misr va Iordaniya Isroil bilan diplomatik aloqalarga ega bo‘lgan.