Samarqandda Cobalt yuk mashinasi tirkamasi ostiga kirib ketdi. Ikki kishi vafot etdi

Samarqand viloyati Kattaqo‘rg‘on tumanida Cobalt «Kamaz» yuk mashinasi tirkamasi ostiga kirib ketgan. Oqibatda ikki kishi vafot etgan. Bu haqda viloyat IIB axborot xizmati xabar bermoqda.

Ma’lum qilinishicha, joriy yil 16 dekabr kuni soat 14:05larda davlat ahamiyatiga ega bo‘lgan 4R-46 Samarqand-Kattaqo‘rg‘on yo‘lining Kattaqo‘rg‘on tumani Omongavhar mahallasidan o‘tuvchi 46-kilometrida odam o‘limi bilan bog‘liq yo‘l-transport hodisasi sodir bo‘lgan.

Harakatlanib kelayotgan Cobalt mashinasi «Kamaz» yuk mashinasi tirkamasiga borib urilgan. Oqibatda Cobalt mashinasida ketayotgan yo‘lovchilardan biri voqea joyida, ikkinchisi esa shifoxonada vafot etgan.

Qayd etilishicha, Kattaqo‘rg‘on tumani IIB YHXB tomonidan sodir bo‘lgan hodisa yuzasidan muhokama o‘tkazilgan va haydovchilarga yo‘llarda harakatlanish davomida yo‘l harakatlariga rioya qilish uqtirilgan.