Lavrov Donbassdagi Rossiya fuqarolarini himoya qilish uchun barcha imkoniyatlar ishga solinishini aytdi

Moskva Kiyevning Donbassdagi har qanday ehtimoliy ig‘vogarliklariga javob qaytaradi va Ukraina sharqidagi o‘z fuqarolarini himoya qilish uchun bor imkoniyatlarini ishga soladi. Rossiya tashqi ishlar vaziri Sergey Lavrov ana shunday bayonot bilan chiqdi.

«Ukrainadagi nizoni siyosiy-diplomatik yo‘l bilan hal qilish uchun sa’y-harakatlarni davom ettiramiz. Kiyevning Donbassga qarshi har qanday ehtimoliy harbiy ig‘vogarliklariga munosib javob qaytariladi», — dedi u.

Lavrovning qo‘shimcha qilishicha, Ukrainadagi vaziyat Rossiyani xavotirga solmoqda.

Uning so‘zlariga ko‘ra, Kiyev «Ukrainani rejali ravishda Rossiyaga qarshi harbiy platsdarmga aylantirayotgan» AQSh va NATOning qo‘llab-quvvatlashidan foydalanmoqda.

Lavrovning ta’kidlashicha, Ukrainaga g‘arb mamlakatlari tomonidan qurol berilishi katta yo‘qotishlarga olib kelishi mumkin.

Eslatib o‘tamiz, 30 dekabr kuni AQSh prezidenti Jo Bayden hamda Rossiya prezidenti Vladimir Putin telefonda muloqot qildi. Amerika prezidenti Rossiya agressiyani davom ettiradigan bo‘lsa, jiddiy sanksiyaga uchrashi va Ukrainaga harbiy yordam kuchaytirilishidan ogohlantirgan.