Avstraliya ham fuqarolarini Ukrainadan olib ketishni boshladi

24 yanvar, dushanba kunidan boshlab avstraliyalik diplomatlarning oila a’zolarini Ukrainadan olib ketish boshlangan. Bu haqda qator Avstraliya nashrlari yozgan.

Avstraliya hukumati fuqarolariga Ukrainaga bormaslikni ham maslahat bergan. Ukrainada bo‘lib turgan avstraliyaliklarga esa mamlakatni tark etish tavsiya qilingan. Avstraliya nashrlarining hisoblashicha, Ukrainada 1,5 ming nafarga yaqin avstraliyalik fuqaro bo‘lishi mumkin. The Sydney Morning Herald nashrining yozishicha, hukumat Ukrainada qolayotgan avstraliyaliklarga xavflilik darajasi oshgani va urush boshlangan taqdirda yashirinish mumkin bo‘lgan joylar haqida ma’lumot bergan.

Franss press nashrining yozishicha, Fransiya hukumati ham fuqarolariga zarur ehtiyojsiz Ukrainaga bormaslikni tavsiya qilgan. Oldinroq AQSh va Britaniya o‘z diplomatlarining oila a’zolarini Ukrainadan olib chiqib ketishni boshlagandi.