Australian Open'da finalchilar aniqlandi. Medvedev endi Nadalning «bayramini buzish»ga urinadi

Erkaklar o‘rtasidagi yakkalik bahslarida finalchilar ma’lum bo‘ldi. Ispaniyalik Rafael Nadal italiyalik Matteo Berrettini bilan bahsni to‘rt setda o‘z foydasiga hal qildi: 6-3, 6-2, 3-6, 6-3.

Ayni damda dunyoning beshinchi raketkasi hisoblangan Nadal faoliyati davomida 29-marta «katta dubulg‘a» turnirlari finaliga chiqdi. U finallarning 20 tasida zafar quchgan. Australian Open'da Nadal oltinchi marta finalda o‘ynaydi. Ispaniyalik tennischi ularning bittasida g‘alaba qozongan, to‘rt marta yengilgan.

Ikkinchi finalchi rossiyalik dunyoning ikkinchi raketkasi Daniil Medvedev bo‘ldi. U yarimfinalda gretsiyalik Stefanos Tsitsipasni to‘rt setda mag‘lub etdi: 7-6, 4-6, 6-4, 6-1.

Medvedev faoliyati davomida to‘rtinchi marta «katta dubulg‘a» tasnifidagi musobaqa finaliga chiqdi. Bungacha rossiyalik tennischi ikki marta US Open, bir marta Australian Open finalida o‘ynagan. O‘tgan yil Avstraliyadagi finalda Novak Jokovichga yengilgan, AQSh ochiq chempionatida esa aynan Jokovich ustidan g‘alaba qozongan.

Daniil Medvedev o‘tgan yil US Open finalida Novak Jokovichga 21-marta «katta dubulg‘a» sovrinini qo‘lga kiritishga yo‘l qo‘ymagandi. Endi rossiyalik tennischi yana bir afsonaviy tennischi Nadalga 21-sovrinni yutishga xalaqit berishga urinib ko‘radi. Hozircha Medvedev va Nadal o‘rtasidagi o‘zaro o‘yinlarda ustunlik ispaniyalik sportchi tomonida: 3-1.

Yilning ilk yirik musobaqasi Australian Open'ning bu yilgi sovrin jamg‘armasi 54 million dollarni tashkil etadi. G‘olib 3,1 million dollar, finalchi 1,5 million dollar mukofotni qo‘lga kiritadi. Avstraliya ochiq chempionatida g‘alaba qozonish bo‘yicha rekordchi dunyoning birinchi raketkasi Novak Jokovich hisoblanadi. To‘qqizta finalda ishtirok etgan serb ularning barchasida g‘alaba qozongan.

Bu galgi bahslarda Jokovich koronavirusga qarshi emlanmagani ortidan kelib chiqqan mojaro sabab ishtirok eta olmayapti.