Qirg‘iziston Milliy energoxolding rahbari Xorazm viloyatida bo‘ldi

Qirg‘iziston Respublikasi Milliy energoxolding boshqaruvi raisi Talaybek Baygaziyev Xorazm viloyatida bo‘lib, elektr energiyasini hisobga olish va nazorat qilishning avtomatlashtirilgan tizimi (ASKUE) bilan tanishdi.

Foto: “Xorazm hududiy elektr tarmoqlari” AJ Matbuot xizmati

«Hududiy elektr tarmoqlari» AJ boshqaruv raisining birinchi o‘rinbosari Jahongir Obidjonov unga sohada olib borilayotgan islohotlar, xususan, elektr energiyasini hisobga olish va nazorat qilishning avtomatlashtirilgan tizimi (ASKUE) haqida ma’lumot berdi.

Mehmonlar «Elektr energiyasini hisobga olishni avtomatlashtirish markazi»da bo‘lib, ish jarayonini kuzatishdi. Ular viloyat, tuman (shahar) va mahallalar kesimida elektr energiyasi iste’molchilarining ma’lumotlari saqlanishi, maxsus dasturiy ta’minot orqali elektr energiyasining soatlik, sutkalik, oylik va yillik balansini shaklllantirish, ko‘p tariflik tizimida hisob-kitoblarni amalga oshirish imkoni haqida ma’lumotga ega bo‘lishdi.

Shuningdek, qarzdor iste’molchilarni to‘liq avtomatik ravishda o‘chirish va sarf qilingan elektr energiyasi uchun to‘lov amalga oshirilgandan so‘ng qayta yoqish, masofadan turib elektr hisoblagichlarni qayta dasturlash, iste’molchilar hisoblagichlaridan olingan ma’lumotlarni qayta ishlash hamda energetika tizimini nazorat qilish kabi vazifalarni amalga oshirilishini o‘rganishdi.