Buxoroda 1500 dollarga fuqaroning o‘qishini ko‘chirib bermoqchi bo‘lgan shaxs ushlandi

Kogon tumanida fuqaroni chet davlatga o‘qishga kiritib, keyinchalik o‘qishini ko‘chirib berishni va’da qilgan shaxs qo‘lga olingan. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.  

Ma’lum qilinishicha, fuqaro A.X. fuqaro Sh.ni Qozog‘istondagi universitetga o‘qishga kiritib, keyinchalik vakolatli tanishlari orqali o‘qishini O‘zbekistondagi universitetlardan biriga ko‘chirib berish evaziga 1 500 AQSh dollari so‘ragan. U kelishilgan pulni olayotganda huquqni muhofaza qiluvchi organlar xodimlari tomonidan o‘tkazilgan tezkor tadbirda ushlangan. 

Holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Buxoro va Samarqand viloyatida fuqarolarni texnikumga o‘qishga kiritib qo‘yishni aytib, pul olganlar ushlangandi.