Endi o‘qishni ko‘chirishda ham sertifikatlar uchun ball beriladi

Hukumat qarori bilan xorijiy va nodavlat oliy ta’lim muassasalaridan davlat OTMga o‘qishini ko‘chirish istagida bo‘lgan talabgorlar uchun yangi imkoniyat yaratildi. Endi chet tili va umumta’lim fanlari bo‘yicha milliy hamda xalqaro sertifikatlar imtihon natijalarini baholashda hisobga olinadi.

Foto: Kun.uz

Tasdiqlangan yangi tartibga ko‘ra, o‘qishini ko‘chirish uchun test sinovlarida ishtirok etayotgan talabgorlarning milliy yoki xalqaro tan olingan sertifikatlari tegishli fanlar bo‘yicha baholash jarayonida inobatga olinadi.

Jumladan, V1 darajadagi milliy yoki xalqaro sertifikatga ega bo‘lgan talabgorlarga tegishli fan bo‘yicha belgilangan maksimal ballning 75 foizi beriladi. V2 va undan yuqori darajadagi sertifikat sohiblari esa ushbu fan bo‘yicha maksimal ballga ega bo‘ladi.

Mazkur baholash mexanizmi abituriyentlar uchun amalda bo‘lgan sertifikatlarni baholash tartibi asosida qo‘llaniladi.

Shu vaqtga qadar o‘qishini ko‘chirish uchun imtihon topshirayotgan talabgorlar sertifikatga ega bo‘lsa ham, bu holat ularning natijalariga ta’sir qilmas edi. Yangi tartib esa sertifikat sohiblariga qo‘shimcha imkoniyat va ustunlik yaratadi.

Mutasaddilarning ta’kidlashicha, mazkur o‘zgarish ta’lim sifatini oshirish, bilim va ko‘nikmalarni xolis baholash hamda iqtidorli yoshlarni qo‘llab-quvvatlashga xizmat qiladi.