O‘zbekistonda vodorod energetikasini rivojlantirishga 10 milliard so‘m ajratiladi

Yangi O‘zbekistonning 2022–2026 yillarga mo‘ljallangan taraqqiyot strategiyasida vodorod energetikasini rivojlantirishga ham alohida e’tibor qaratilgan, deb xabar bermoqda Energetika vazirligi.

2022 yilning may oyiga qadar vodorod energetikasi texnologiyalari sohasida umumiy qiymati 10 mlrd so‘mlik ilmiy-tadqiqotlarni tashkil etish va yangi ilmiy ishlanmalar asosida vodorod energiyasini olish, saqlash va tashish texnologiyasini yaratish dasturi tasdiqlanadi.

Unga ko‘ra:

2023-2024 yillarda vodorod energetikasi materiallari va texnologiyalari bo‘yicha ilmiy loyihalarni amalga oshirish orqali yangi texnologiyalar (vodorodni saqlash uchun adsorberlar, metalgidrid tashuvchilar, vodorod olish uchun nanokatalizator va quyosh energiyasi asosidagi elektroliz) yaratiladi;

2022-2024 yillarda vodorod energetikasi sohasida yetakchi xorijiy ilmiy markaz va universitetlarga 20 nafar yosh olim va mutaxassislarning ilmiy stajirovkalari tashkil etiladi.

Energetika vazirligi huzurida tashkil etilgan Qayta tiklanuvchi energiya manbalari milliy ilmiy-tadqiqot instituti tuzilmasida Vodorod energetikasi ilmiy-tadqiqot markazi hamda Qayta tiklanuvchi va vodorod energetikasi texnologiyalarini sinash va sertifikatlash laboratoriyasi tashkil etilgan.

Hozirda ushbu institutda qayta tiklanuvchi va vodorod energetikasini rivojlantirish borasida ilmiy izlanishlar olib bormoqda, deyiladi vazirlik xabarida.

Avvalroq, Energetika vazirligi elektromobillarni quvvatlantirish stansiyalari tarmog‘ini rivojlantirish dasturini taqdim etishi xabar berilgandi. 

2022 yilning 4-choragiga qadar elektromobillarni quvvatlantirish stansiyalari tarmog‘ini yaratish va rivojlantirish yuzasidan chora-tadbirlar dasturi ishlab chiqiladi.

Bunda, respublikada faoliyat yuritayotgan AGTKSh, AYoQShlarda, aholi ko‘p yig‘iladigan obektlar hududlarida elektr quvvatlantirish, shu jumladan qayta tiklanuvchi energiya manbalari yordamida quvvatlantirish stansiyalari o‘rnatilishi nazarda tutiladi.