Rossiya Ukrainaga «istalgan» lahzada bostirib kirishi mumkin, bu haqda 11 fevral kuni AQSh prezidenti Jo Bayden administratsiyasi vakili ma’lum qildi. «Biz bosqin istalgan vaqtda, jumladan Olimpiya o‘yinlari davom etayotgan vaqtda boshlanishi mumkin bo‘lgan vaqtda turibmiz», — dedi AQSh davlat kotibi Entoni Blinken. AQSh prezidentining milliy xavfsizlik masalasi bo‘yicha maslahatchisi Jyeyk Sallivan Rossiya Ukraina chegaralari yaqinida ushbu mamlakatga bostirib kirish uchun yetarli miqdorda qo‘shin to‘plagani, ammo AQShda Rossiya prezidenti Vladimir Putin bostirib kirish bo‘yicha yakuniy qarorga kelgani haqida ma’lumot yo‘qligini aytdi.
Sallivan Rossiya baribir Ukrainaga bostirib kiradigan bo‘lsa, hujum havodan bombardimon qilish va raketalar yo‘llash bilan boshlanishi mumkinligi, rossiyalik harbiylar Kiyevga hujum qilishi ham istisno etilmasligini qo‘shimcha qildi.
Politico nashrining yozishicha, Jo Bayden ittifoqchilarga bosqin 16 fevral kuni boshlanishi mumkinligini aytgan. Der Spiegel ma’lumotiga ko‘ra, bu sana haqida Markaziy razvedka boshqarmasi va Amerika armiyasi rahbariyati tomonidan AQSh hukumati va NATO mamlakatlari xabardor qilingan. Der Spiegel xabarida, Berlindagilar Vashingtonning xulosasi aynan qanday dalilga asoslanganini bilmasliklari, shu bilan birga amerikaliklar hisoboti juda batafsil va unda juda ko‘p manbalarning ma’lumotlari keltirilgani qayd etilgan. «Rossiyaliklar bosqini yo‘nalishlari aniq ko‘rsatilgan, shuningdek ruslarning qaysi harbiy qismlari qanday vazifalarni zimmasiga olgani bayon etilgan», — deya yozadi Der Spiegel nemis harbiylari diplomatik doiralaridagi manbasiga tayanib.
Yevropaning ba’zi davlatlari Rossiyaning rejalari borasidagi razvedka baholarida AQSh bilan hamfikr emas. Buyuk Britaniya vakili mamlakat rasmiylari 16 fevral kuni sodir bo‘lishi mumkin bo‘lgan voqealar bo‘yicha razvedka ma’lumotlarini boshqacha talqin etishayotganini ta’kidlagan. Politico nashrining yozishicha, ikki yevropalik diplomat (ular qaysi mamlakatlar vakillari ekaniga aniqlik kiritilmagan) bu ma’lumotga yanada «skeptik» yondashmoqda. Xabarda aytilishicha, ulardan biri bunga ishonchi kamligi, sababi Putin bunday qo‘pol xatoga yo‘l qo‘ymasligini ta’kidlagan.
Rossiya Ukrainaga bostirib kirish niyati yo‘qligini takrorladi. AQShning yangi bayonoti Rossiya TIV tomonidan «isterika» deb ataldi. «Anglosakslarga urush kerak. Har qanday yo‘l bilan. Provokatsiyalar, dezinformatsiyalar va tahdidlar — ularning o‘z muammolarini hal qilishning sevimli metodi. Amerika harbiy-siyosiy mashinasi katogi (g‘altak mashina) yana odamlar hayotini bosib o‘tishga tayyor. Butun dunyo militarizm va imperiya ambitsiyalari o‘zini fosh etayotganiga guvoh bo‘lib turibdi», — deya yozgan Rossiya tashqi ishlar vazirligi rasmiysi Mariya Zaxarova telegramdagi kanalida.
