09:47 / 21.02.2022
25185
Қозоғистон собиқ мудофаа вазири Мурод Бектанов ҳибсга олинди

Қозоғистон собиқ мудофаа вазири Мурод Бектанов мамлакатда жорий йилнинг январь ойи бошида юзага келган тартибсизликлар вақтида ҳаракатсизликда гумонланиб ҳибсга олинди.

Мурод Бектанов / Фото: AA

Қозоғистон Бош прокуратураси маълумотига кўра, қўлга олинган шахс Нур-Султондаги тергов изоляторига жойлаштирилди. Собиқ вазирга нисбатан Қозоғистон Жиноят кодексининг 452-моддаси (ҳокимиятнинг ҳаракатсизлиги) бўйича терговга қадар текширув бошланган.

Мурод Бектанов Қозоғистон Мудофаа вазирлигини 2021 йил августидан буён бошқариб келаётган эди. Республика президенти Қосим-Жўмарт Тўқаев 19 январь куни уни лавозимидан озод қилганди.

Январь ойи бошида Қозоғистон ғарбидаги Жанаўзен шаҳрида бошланган намойишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. Намойишчилар суюлтирилган газ нархини пасайтиришни талаб қилди. 

Тартибсизликлар чоғида намойишчилар маъмурий бинолар, полиция бўлимлари ва дўконларга ҳужум қилди. Республиканинг бир қатор шаҳарларида талончилар пайдо бўлди. 

Расмий маълумотларга кўра, 220 дан ортиқ киши тартибсизликлар қурбони бўлди, жумладан, ҳуқуқ-тартибот ва махсус идоралар, ҳарбийларнинг 19 нафар ходими ҳалок бўлди.

11 январь куни Қозоғистон президенти ҳукуматнинг янги таркибини тасдиқлади.

Top