Ukraina TIV fuqarolarni Rossiyani zudlik bilan tark etishga chaqirdi

Ukraina tashqi ishlar vazirligi mamlakat fuqarolariga Rossiyaga bormaslikka, u yerda bo‘lib turganlarni esa zudlik bilan chiqib ketishga chaqirdi.

Idora sayti xabarida qayd etilishicha, bu choralar «Rossiya agressiyasi kuchayishi» munosabati bilan taklif etilgan. «Ushbu tavsiyalarni e’tiborsiz qoldirish Rossiya Federatsiyasidagi Ukraina fuqarolarini zarur himoya bilan ta’minlashni sezilarli darajada murakkablashtiradi», — deyiladi TIV bayonotida.

• 21 fevral kuni RF prezidenti Vladimir Putin rossiyaliklarga murojaatida Ukraina hukumatini qat’iy tanqid qilgan, shundan keyin ushbu mamlakat sharqidagi hududda o‘zini o‘zi mustaqil deb e’lon qilgan Donetsk va Lugansk respublikalarini tan olish to‘g‘risidagi farmonni imzolagandi.
• Bunga javoban 22 fevral kuni kechqurun Vladimir Zelenskiy ham telemurojaat bilan chiqdi. U Rossiya Ukraina suverenitetini buzgani va Minsk kelishuvlaridan bir tomonlama chiqqani, shuningdek Ukraina ziddiyatni tinch yo‘l bilan hal qilish tarafdori ekanini qayd etdi. Keyinroq Zelenskiy Ukraina Rossiya bilan diplomatik aloqalarni uzish imkoniyatlarini ko‘rib chiqayotganini ma’lum qildi. Ukrainlar prezidenti zaxiradagilarni harbiy xizmatga chaqirish to‘g‘risida farmon imzolagan.
• AQSh, Yevroittifoq, Buyuk Britaniya, shuningdek Yaponiya, Avstraliya va Kanada DXR va LXRni tan olgani uchun Rossiyaga qarshi sanksiyalar joriy etgan.