14:30 / 06.03.2022
17420
“Каптарлар отаси” – қушларни севувчи нафақахўр

Бухоролик Жаъфар Ҳожиев – етмишга яқинлашиб қолган нафақахўр. У қушларни ўз яқинларидек парваришлайди. Айниқса, қўлдан дон ейдиган, одамлардан чўчимайдиган каптарлари машҳур. 

Жаъфар Ҳожиев Бухоро шаҳридаги “Чор Бакр” тарихий-меъморий мажмуасида хўжалик ишларига қараб юради, ҳам азон айтади. Бу ерда ишлаётганига 7 йилдан ошган. У қушларни, жониворларни жуда яхши кўради. Ҳозир 15 турдан ортиқ қушлари бор, уларни кунига 2-3 маҳалдан ўзи овқатлантиради. Одамлар мажмуага, айниқса, қўлга ўрганган каптарларни кўриш учун келади.

Нафақахўр “Чор Бакр”га қушлар 3 йил олдин олиб келинганини айтади.

“Асли куёвим қушларга ишқибоз. У киши бизга 20 дона каптар келтириб берганди. Шундан кейин буларни аста-секин одамларга қўндирадиган даражада ўргатганман. Ўргатиш қийин эмас. Фақат 1-2 кун оч қолдириб, ўзингизга ўргатишингиз керак”, – дейди у.

 Ҳозир бу ерда 50дан зиёд каптар бор. Уларга дон бермоқчи бўлсангиз, қўлингизга, бошингизга келиб қўниб олади.

“Каптарлар – тинчлик рамзи. Одамларга хурсандчилик улашади, одам беғам бўлиб, ҳамма ғамдан фориғ бўлиб кетади. Қўлингизга ушласангиз, баданлари иссиқ. Ўзингиз роҳат қиласиз”, – дейди Жаъфар ака.

Каптарлардан ташқари мажмуада олмахон, товус, қуён, укки, японка товуғи, ҳинд сесаркаси, каклик ва туяқушлар ҳам бор.

Зуҳра Абдуҳалимова,
Kun.uz мухбири

Мавзу
Ҳаётий ҳикоялар
Турфа тақдирлар ва умр манзаралари
Барчаси
Top