Olmaliqda “perchatka”da yashirilgan 117,5 mln so‘mlik qimmatbaho metallar fosh etildi

"Olmaliq KMK" AJning bir guruh ishchilari 117,5 mln so‘mlik 160.5 gr qimmatbaho metallarni korxonadan olib chiqishga uringan.

Qayd etilishicha, DXXning Toshkent viloyati boshqarmasi xodimlari va boshqa huquqni muhofaza qiluvchi organlar hamkorligida tezkor tadbir o‘tkazilgan. Unda qimmatbaho metall o‘g‘rilari qo‘lga olingan.

Tezkor tadbirda, olmaliqlik X.F. "Olmaliq KMK" AJning bir guruh ishchilari bilan jinoiy til biriktirgan. U "Oltin va kumushni affinajlash sexi"ning kiyim almashtirish xonasiga qimmatbaho metall – sanoat qumlarini yashirib qo‘ygani fosh bo‘lgan.

Huquqni muhofaza qiluvchi organlar xodimlari tomonidan ushbu yacheykaning pastki qismida “perchatka”da joylashtirilgan umumiy og‘irligi 4 kg 435 gr bo‘lgan sanoat mahsuloti – shlam protsessual tarzda rasmiylashtirib olingan. Laboratoriya tahlili natijalariga ko‘ra, ushbu sanoat qumlari tarkibida umumiy narxi 117,5 mln so‘mlik 160.5 gr qimmatbaho metallar mavjudligi aniqlangan.

Fuqaro X.F. Chirchiq shahrida "Olmaliq KMK” AJning qo‘riqlash xizmatida bo‘lib o‘tayotgan qabulda qatnashish uchun kelgan vaqtida qo‘lga olingan. Mazkur holat yuzasidan Jinoyat kodeksining tegishli moddalari bilan jinoiy ish qo‘zg‘atilgan.

Avvalroq, Samarqandda qimmatbaho oltin bo‘laklarini noqonuniy ravishda olib ketayotgan fuqaro ushlanganligi xabar qilingan edi.