Yetim bolalar evakuatsiyasi va yer bilan bitta qilingan cherkov. Urush suratlari

Urush boshlanganidan buyon 32 kun o‘tdi. BMT ma’lumotlariga ko‘ra, bu vaqt mobaynida mamlakatni 3,8 milliondan ortiq kishi tark etib ulgurdi. Mariupol aholisining yarmidan ortig‘i shaharni tashlab ketishga majbur bo‘lgan — 540 mingdan ortiq kishi yashagan shahar oy boshidan buyon qamalda qolmoqda. Vladimir Zelenskiy ukrainaliklarga harbiylarning harakati aks etgan foto va videolarni tarqatishni taqiqlovchi qonun qabul qildi. Ukraina hududlari bo‘ylab havo hujumidan ogohlantiruvchi trevogalar yangrashi davom etmoqda. Chernobil AES joylashgan hududda o‘n ming gektar maydondagi o‘rmonlar yonmoqda.

So‘nggi soatlardagi asosiy yangiliklar:

• Ukraina prezidenti rossiyalik harbiylar tomonidan o‘g‘irlab ketilgan merlarning ayrimlari jonsiz holda topilgani haqida ma’lum qildi.
• Rossiyaliklarga Facebook va Instagram’dan foydalanish taqiqlanmaydi. Bu ushbu ijtimoiy tarmoqlarning bosh kompaniyasini «ekstremistik tashkilot» deb topgan sud qarorida ko‘rsatilgan.
• Ukraina prezidenti RF hukumatining uning intervyusi Rossiya nashrlarida e’lon qilinishiga qarshilik ko‘rsatganiga munosabat bildirdi: «Agar bu shu qadar fojiali bo‘lmaganida, kulgili bo‘lgan bo‘lardi».
• Germaniya kansleri Olaf Shols NATO tinchlikparvar kuchlari Ukrainaga jo‘natilishi va mamlakat osmoni yopilishiga qarshi chiqdi.
• Urush boshlanganidan buyon Ukrainada 143 bola halok bo‘lgan, 216 bola yaralangan.
• Ukraina qurolli kuchlari Bosh shtabi Donbassda dushmanning besh hujumi qaytarilgani, Kiyevga hujum davom etayotganini, o‘tgan kunda Ukraina tomoni rossiyaliklarning to‘rt samolyoti, bir vertolyoti, ikki droni va ikki qanotli raketasi yo‘q qilinganini ma’lum qilgan.
• Rossiya mudofaa vazirligi Rossiya aviatsiyasi Ukrainaning 36ta harbiy obekti yo‘q qilingani, 5ta samolyoti, 19ta droni va beshta raketasi urib tushirilganini ma’lum qilgan.