Toshkentda Mercedes-Benz mashinasi yonib ketdi

Toshkent shahar Mirzo Ulug‘bek tumanida 10 aprel kuni Mercedes-Benz mashinasida yong‘in sodir bo‘ldi. 

Favqulodda vaziyatlar vazirligi xabar berishicha, soat 13:43 da Mustaqillik shohko‘chasida harakatlanib ketayotgan avtomobilda yong‘in sodir bo‘layotgani to‘g‘risida shahar FVBga xabar kelib tushgan. Shunga ko‘ra, 2 ta yong‘in-qutqaruv ekipaji soat 13:49 da yong‘inga yetib borib, holat 13:52 da bartaraf etilgan.

Yong‘inda avtomobilning motor va salon qismi yonib zararlangan. Yong‘in oqibatida tan jarohati olgan va halok bo‘lganlar yo‘q.

Yo‘l harakati xavfsizligi xizmati yong‘inning kelib chiqish sababini ma’lum qildi.

«Dastlabki ma’lumotlarga ko‘ra, 2022 yil 10 aprel kuni soat 13:40 larda Toshkent shahri M.Ulug‘bek tumani, Mustaqillik shohko‘chasi Pushkin metro bekati qarshisida, haydovchi, 1985 yilda tug‘ilgan O.O. boshqaruvida bo‘lgan Mercedes-benz GL 500 rusumli avtomobilning dvigatel qismida elektr simlarida qisqa tutashuv sababli yong‘in yuzaga kelgan», deyiladi xabarda.