Finlandiyaning O‘zbekistondagi yangi elchisi tayinlandi

Tashqi ishlar vazirligida Finlandiyaning O‘zbekistonda yangi tayinlangan elchisi (qarorgohi Helsinkida) Ilkka Ryaysyanen bilan videokonferensiya shaklida uchrashuv bo‘lib o‘tdi, deb xabar bermoqda «Dunyo».

Muzokaralarda elchining ishonch yorliqlarini taqdim etish uchun Toshkentga tashrifini tashkil etish, O‘zbekiston vazirlik va idoralarida ikki tomonlama uchrashuvlar o‘tkazishning amaliy jihatlari, O‘zbekiston-Finlandiya hamkorligini kengaytirish bo‘yicha vazifalar muhokama qilindi.

Joriy yilda Toshkentda siyosiy maslahatlashuvlarning muntazam raundlarini va savdo-iqtisodiy, ilmiy-texnikaviy hamkorlik bo‘yicha hukumatlararo komissiya yig‘ilishini o‘tkazishga kelishib olindi.

Shuningdek, Markaziy Osiyo mamlakatlari bilan hamkorlik bo‘yicha Finlandiya parlamentlararo guruhi rahbari Kimmo Kilyunen boshchiligidagi delegatsiyaning 2022 yil avgust oyida O‘zbekistonga tashrifini birgalikda tayyorlash bo‘yicha kelishuvga erishildi.