Zarbalar ostida qolgan donbassliklar va odatiy hayotga qaytayotgan buchaliklar. Urush suratlari

Urushning 91-kunida Checheniston rahbari Ramzan Qodirov rossiyalik harbiylar Lisichanskka kirganini ma’lum qildi. Lugansk oblasti ma’muriyati rahbari Sergey Gaydayning xabar qilishicha, oblast hududining atigi 5 foizi Ukraina nazoratida qolmoqda. Ukraina prezidenti Volodimir Zelenskiy Rossiya bilan viza rejimi joriy etish g‘oyasini ma’qulladi. Zaporojye oblastining rossiyalik harbiylar nazoratidagi qismida Rossiya pasportini tarqatishga tayyorgarlik ko‘ra boshlashdi. Vladimir Putin urush boshidan buyon ilk bor rossiyalik yarador harbiylarni ko‘rish uchun hospitalga tashrif buyurdi.

Erdo‘g‘anning matbuot kotibi Ibrohim Qalin va Turkiya delegatsiyasi Finlandiya tashqi ishlar vaziri o‘rinbosari Yukka Salovaara bilan bilan uchrashuvda. Chorshanba kuni Finlandiya va Shvetsiyadan yuqori martabali rasmiylar Turkiyaning ushbu mamlakatlar NATO a’zoligiga e’tirozi borasida muzokaralar o‘tkazish uchun Anqaraga kelishdi. (Turkish Presidency via AP)

Ukrainadagi urushning 92-kuni. So‘nggi soatlardagi asosiy ma’lumotlar

Urushlarni tadqiq qilish institutiga ko‘ra, rossiyalik harbiylar Severodonetsk uchun jang boshlashga tayyor. Shahar deyarli qurshab olingan, unga olib boruvchi asosiy yo‘llar doimiy ravishda o‘qqa tutilmoqda.
Zaporojye rossiyalik harbiylar tomonidan o‘qqa tutilishi oqibatida kinoteatr, kafe, o‘nlab xususiy uylar, o‘rta va kichik biznes imoratlari vayronaga aylangan, bir ayol halok bo‘lgan. Chorshanba kuni Krivoy Rog va Pokrovsk shaharlariga ham zarbalar yo‘llangan.
Buyuk Britaniya tashqi ishlar vaziri Liz Trass rossiyaliklar yetakchisi bilan «yarashish» xavfli ekani, uning mag‘lubiyatini ta’minlash lozimligini aytib, yevropalik hamkasblarini Ukrainaga ko‘proq qurol berish hamda Rossiya bilan munosabatlardagi sanksiyalarni kuchaytirishga chaqirdi.
Yevroittifoq, AQSh va Britaniya Rossiyaning Ukrainada sodir etgan harbiy jinoyatlarini tekshirish bo‘yicha maxsus xalqaro guruh tashkil etdi.
AQSh Davlat departamenti Rossiya prezidenti Vladimir Putinning Zaporojye va Xerson oblastlarining rossiyalik harbiylar nazoratiga o‘tgan qismidagi ukrainlarga Rossiya fuqaroligini berishni soddalashtirish to‘g‘risidagi farmonini qoraladi.
Ukraina prezidenti Volodimir Zelenskiy hukumatga Rossiya fuqarolarining Ukrainaga kirishida viza rejimini joriy qilish masalasini ko‘rib chiqishga topshiriq berdi.

Quyida 25 may kuni Ukrainaning turli hududlarida olingan fotosuratlar.

Donbass shimoli