Donbass shimolida janglar, Xarkov atrofida kungaboqar ekayotgan fermerlar. Urush suratlari

Ukrainada urushning 95-kuni boshlandi. Donbass uchun janglar davom etmoqda: RF mudofaa vazirligi Liman shahri to‘liq nazoratga o‘tganini e’lon qilgandi, ammo Ukraina hukumati buni rad etmoqda. Baxmut - Lisichansk trassasi rossiyalik harbiylar tomonidan o‘qqa tutilmoqda. Donbass shimolidagi aholi turar joylari va fuqarolik obektlari jiddiy shikastlangan.

Vayron qilingan va DXR nazoratiga o‘tgan Mariupol aholisi Rossiya FVV tomonidan keltirilgan suv uchun navbatda turibdi.
Alexei Alexandrov / AP / Scanpix / LETA

Ukrainadagi urush. So‘nggi ma’lumotlar

Severodonetsk ostonasida qaqshatqich janglar davom etmoqda, Lugansk oblasti harbiy ma’muriyati rahbari Sergey Gayday shahar hamon Ukraina nazoratida qolayotgani, rossiyalik harbiylar shahar tashqarisidagi «Mir» mehmonxonasi hududidan oldinga o‘ta olmayotgani va jiddiy yo‘qotishlarga uchragani haqida ma’lum qilgan;
Ukraina Donetsk oblastidagi Liman shahri Rossiya harbiylari tomonidan egallangani to‘g‘risidagi xabarlarni rad etgan va shahar uchun janglar davom etayotganini bildirgan;
Fransiya prezidenti Emmanuel Makron va Germaniya kansleri Olaf Shols rossiyaliklar prezidenti bilan qariyb bir yarim soat davom etgan telefon muloqotida Vladimir Putindan Mariupoldagi «Azovstal» zavodida asirga tushgan 2500 nafar ukrain harbiysini ozod etishni talab qildi. Shuningdek, ular Putinni «ukrainlar prezidenti bilan jiddiy muzokaralar boshlash hamda mojaroni hal qilishning diplomatik yechimini topish»ga chaqirishdi;
Putin harbiy xizmat o‘tash haqidagi dastlabki shartnomani tuzish uchun yosh chegarasini bekor qilish to‘g‘risidagi qarorni imzoladi; endi qonun kuchga kirib, 40 yoshdan katta bo‘lganlarni ham urushga yollash mumkin bo‘ladi. Bu qaror Rossiya armiyasi shaxsiy tarkibda o‘tkir yetishmovchilikka uchrayotganining navbatdagi belgisi bo‘ldi;
Ukraina ombudsmeni Lyudmila Denisova asirlikdan qaytgan ukrain harbiylari joylashtirilgan shifoxonada bo‘lgach, ular asirlikda qiynoqlar va kamsitishlarga duchor bo‘lishgani haqida aytdi. Denisovaning so‘zlariga ko‘ra, ayniqsa Ukraina armiyasi zobitlari va «Azov» jangchilariga nisbatan o‘ta beshafqatlik bilan munosabatda bo‘lishgan;
Ukraina kemalarga qarshi Harpoon raketalarini qabul qilib oldi. Odessa oblasti harbiy ma’muriyati rahbari Sergey Bratchuk telegram-kanalida shunday yozdi: «Bizga shuncha «garpun»ni Rossiya Qora dengiz flotini to‘liq cho‘ktirib yuborishimiz uchun yuborishdi. Nega ham bunday bo‘lmasin?»

Quyida Ukrainaning turli hududlarida olingan suratlar keltiriladi.

Chernigov