Axborot kodeksining asosiy vazifalari nimadan iborat bo‘lishi lozimligi ochiqlandi

Davra suhbati Milliy mass-mediani qo‘llab-quvvatlash va rivojlantirish jamoat fondi hamda "Mintaqaviy muloqot" xalqaro nodavlat tashkiloti (Sloveniya) bilan birgalikda O‘zbekiston prezidenti administratsiyasi huzuridagi Axborot va ommaviy kommunikatsiyalar agentligi va AQSh davlat departamenti giyohvand moddalarni nazorat qilish va huquq byurosi ko‘magida tashkil etildi. 

Tadbirda Mass-media fondi direktori Nozima Davletova, "Mintaqaviy muloqot" XNT rahbari Myusha Sever, AOKA direktori Asad Xo‘jayev, Senat va Qonunchilik palatasi, Oliy sud, manfaatdor xalqaro va xorijiy tashkilotlar vakillari, O‘zbekistonda akkreditatsiyadan o‘tgan diplomatik vakolatxonalar, tegishli davlat organlari, jamoat tashkilotlari, ommaviy axborot vositalari vakillari ishtirok etdi.

Davra suhbatida mass-media faoliyati keng ko‘lamli masalalari – mazmunli kontentdan tortib O‘zbekistonning jahon sahnasidagi imijini yaxshilash strategiyasigacha bo‘lgan dolzarb masalalar muhokama qilindi.

OAVda gender masalalarini yoritishga hamda ushbu mavzudagi materiallar ayollar huquq va qadr-qimmatini buzmasligi, aksincha ularning jamiyat va global jarayonlar shakllanishidagi o‘rnini ochib berishi uchun nima qilish kerakligiga katta e’tibor qaratildi.

Sud va sud organlari faoliyatining ochiqligini ta’minlash masalasiga ham to‘xtalib o‘tildi. Mutaxassislar mamlakatda ushbu soha bugungi holati va istiqbollarini baholab, xorijiy tajriba muvaffaqiyatli namunalaridan foydalangan holda O‘zbekistonda qaysi jihatlarni moslashtirish va amalga oshirish mumkinligini aniqlashga harakat qildi.

Milliy axborot qonunchiligini takomillashtirish va unifikatsiyalash hamda Axborot kodeksini ishlab chiqish zarurligi alohida masala sifatida ko‘rib chiqildi.

Axborot sohasini tartibga solishga qaratilgan amaldagi qonunlarni unifikatsiyalashga mo‘ljallangan Axborot kodeksi asosiy vazifalari quyidagilardan iborat bo‘lishi lozim:

• ma’lumotlarni himoya qilish;
• shaxs axborot xavfsizligini ta’minlash (inson axborot olishga bo‘lgan ehtiyojini qondirish va uning axborot muhitida xavfsiz ishtirok etishi);
• davlat axborot xavfsizligini ta’minlash (axborot sohasida hayotiy muhim manfaatlarni himoya qilish) va boshqalar.