Germaniya taraqqiyot banki Farg‘onada ichimlik suvi tizimiga 200 mln yevro ajratishi mumkin

Farg‘ona viloyati hokimi Xayrulla Bozorov KfW Germaniya taraqqiyot banki loyiha ma’lumotlari boshqaruvi menejyeri Lea Tereza Shtuf boshchiligidagi delegatsiyani qabul qildi.

Uchrashuvda KfW Germaniya taraqqiyot banki tomonidan ishlab chiqilayotgan Farg‘ona viloyatida ichimlik suvi va oqova suv tizimlarini rekonstruksiya qilish va qurish loyihasi muhokama qilindi. Loyiha uchun 49 mln yevro Germaniya taraqqiyot banki granti ajratilmoqda, loyiha qiymatidan kelib chiqib 150 mln yevrogacha 15 yillik imtiyozli kredit ham taqdim etiladi. Loyihaviy-baholash hujjatini tayyorlash uchun ham KfW tomonidan 3 mln yevro grant ajratilishi ko‘zda tutilmoqda.

Ushbu loyiha doirasida Qo‘qon va Marg‘ilon shaharlarida joylashgan hamda atrof hududlardagi shahar va tumanlarga ham xizmat ko‘rsatuvchi oqova suv tozalash inshootlarini, ushbu hududlardagi ichimlik suvi tizimlarini zamonaviy texnologiyalar asosida rekonstruksiya qilish va qurish rejalashtirilmoqda.

Hozirda loyihani tegishli vazirliklar hamda respublika idoralari bilan kelishish jarayoni davom etmoqda.  

Loyihani muvaffaqiyatli amalga oshirish uchun har tomonlama ko‘mak berishga tayyor ekanini ta’kidlagan viloyat hokimi Xayrulla Bozorov kelgusi oyda viloyat hokimi o‘rinbosari boshchiligidagi farg‘onalik tadbirkor va ishbilarmonlardan iborat delegatsiyaning Germaniyaga tashrifi amalga oshirilishini ma’lum qildi.

KfW Germaniya taraqqiyot banki vakillari bugun Qo‘qon va Marg‘ilon shaharlarida bo‘lib, mavjud ichimlik suvi va oqova suv tizimlari bilan tanishadi.