Yevropada maymun chechagi kasalligini yuqtirish holatlari uch baravarga ko‘paydi – JSST 

Yevropada oxirgi ikki haftada maymun chechagi kasalligini yuqtirish holatlari uch baravarga ko‘paydi. Bu haqda Jahon sog‘liqni saqlash tashkiloti mintaqaviy byurosi direktori Hans Klyuge ma’lum qildi.

U YeIning barcha mamlakatlarini kasallikka qarshi kurashda maksimum choralarni ko‘rishga chaqirdi.

Klyugening fikricha, kasallik tarqalishining avj olishi real xavf tug‘diradi. Uning so‘zlariga ko‘ra, virus qanchalik uzoq vaqt tarqalsa, kasallik noendemik mamlakatlarda shunchalik kuchli o‘rnashib oladi. 

Ma’lumotlarga ko‘ra, hozirga qadar dunyo bo‘yicha maymun chechagi kasalligini yuqtirish bilan bog‘liq 4500dan ortiq holat qayd etilgan. 

Kasallik 51 mamlakatda aniqlangan. Kasallanganlarning 90 foizi Yevropaga to‘g‘ri keladi. Qit’aning 31 mamlakatida maymun chechagi kasalligi aniqlangan bo‘lib, bemorlarning 99 foizi 21 yoshdan 40 yoshgacha bo‘lgan erkaklardir.