Sirdaryo viloyatida ko‘p miqdorda giyohvand modda yetishtirayotgan va saqlab kelayotgan shaxsga jinoyat ishi qo‘zg‘atildi

Viloyat IIB axborot xizmatining xabar berishicha, viloyat IIB va Sayxunobod tumani IIB JQB xodimlari tomonidan o‘tkazilgan tezkor tadbirda, Sayxunobod tumanida yashovchi Sh.Sh.ning yashash xonadoni ko‘zdan kechirilganda ko‘p miqdorda giyohvandlik moddalarini yetishtirib, saqlab kelayotgani ma’lum bo‘lgan.

Jumladan, omborxonasida 3 kg 262 gramm quritilgan holatdagi ko‘knori poyasi, ko‘knori boshi va marixuana giyohvandlik moddalari borligi aniqlangan.

Bundan tashqari, mazkur shaxs 4 tup nam holatdagi nasha giyohvandlik o‘simliklarini noqonuniy saqlab kelayotgani hamda tomorqasida 1 tup nasha va 117 tup ko‘knori giyohvandlik o‘simliklarini ekib, parvarishlab kelayotgani aniqlanib, ular daliliy ashyo sifatida olingan.

Qayd etilishicha, holat yuzasidan Jinoyat kodeksining 276-moddasi 2-qismi «a» bandi va 270-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.

Avvalroq, Denov tumanida yashovchi shaxs 20 kilogramm opiyni 140 ming dollarga sotish uchun olib kelayotganda ashyoviy dalillar bilan qo‘lga olingandi.