AQSh Rossiyaning Vinnitsada harbiy obektga zarba berilgani haqidagi bayonotini rad etdi

AQSh Mudofaa vazirligining yuqori martabali mulozimi Rossiyaning 14 iyulda Vinnitsa markazida rus qo‘shinlari tomonidan berilgan raketa zarbasi garnizon Ofitserlar uyida yig‘ilish o‘tkazayotgan Ukraina harbiylari va xorijlik qurol-yarog‘ yetkazib beruvchilariga qaratilgani haqidagi iddaolarini rad etdi. 15 iyul, juma kuni ismini oshkor qilishni istamagan rasmiy AFP’ga bergan intervyusida: «Menda yaqin atrofda harbiy nishon borligi haqida hech qanday dalil yo‘q», dedi.

«Bu ko‘p qavatli uyga o‘xshardi», dedi Mudofaa vazirligi vakili, shuningdek, u Vinnitsa Rossiya suvosti kemasidan otilgan raketa hujumiga uchraganini tasdiqladi. 

Vinnitsadagi hujumni ham hisobga olgan holda, rasmiy hisob-kitoblarga ko‘ra, Rossiya hujumlari oqibatida so‘nggi bir-ikki hafta ichida 100 dan 150 gacha ukrainalik tinch aholi vakili halok bo‘ldi. 

Vinnitsada bir kun avval raketa hujumi oqibatida halok bo‘lgan 23 kishi uchun 15 iyul motam kuni deb e’lon qilindi. Vinnitsa oblasti davlat ma’muriyati rahbari Sergey Borzovning so‘zlariga ko‘ra, Rossiya raketalari qurboni bo‘lgan uch boladan ikki nafarining, shuningdek, 11 nafar kattalarning shaxsi hozircha aniqlanmagan. Kasalxonada 73 kishi jarohatlangan, 11 kishi bedarak yo‘qolgan deb hisoblanmoqda. 

Rossiya Federatsiyasi Mudofaa vazirligi Vinnitsa shahriga raketa hujumi sodir etilganini tasdiqladi. Idora rasmiy vakilining so‘zlariga ko‘ra, «Kalibr» raketalari o‘sha paytda «Ukraina harbiy-havo kuchlari qo‘mondonligi va xorijiy qurol yetkazib beruvchilar ishtirok etgan yig‘ilish bo‘lib o‘tgan» ofitserlar garnizoni binosiga kelib tushgan. 

Germaniya hukumati Vinnitsaga qilingan hujumni «shafqatsizlik harakati» deb atadi. Bu bolalar o‘limiga sabab bo‘lgan tinch aholi vakillariga qilingan hujum edi, dedi Berlindagi hukumat vakili. U Rossiya Ukrainaga qarshi urushda xalqaro huquqni bir necha bor buzganini qo‘shimcha qildi.