Vladimir Norov BMT bosh kotibining Afg‘oniston bo‘yicha maxsus vakili o‘rinbosari bilan uchrashdi

Uchrashuvda O‘zbekistonning BMT va uning institutlari, xususan, YuNAMA bilan o‘zaro hamkorligining bugungi holati va rivojlanish istiqbollari ko‘rib chiqildi.

V.Norov BMT barqaror rivojlanish maqsadlariga to‘liq mos keladigan 2022-2026 yillarga mo‘ljallangan Yangi O‘zbekistonning taraqqiyot strategiyasi doirasida amalga oshirilayotgan islohotlar haqida ma’lumot berdi.

Afg‘onistondagi mavjud vaziyat yuzasidan fikr almashildi. M.Potsel prezident Shavkat Mirziyoyevning Afg‘oniston bo‘yicha xalqaro konferensiya o‘tkazish tashabbusini yuqori baholadi. Anjuman afg‘on xalqiga gumanitar yordam ko‘rsatish va mamlakat iqtisodiyotini tiklash masalalari bo‘yicha xalqaro hamjamiyat umumiy yondashuvlarini ishlab chiqish uchun muhim asos yaratadi.

Bu galgi konferensiya O‘zbekistonning Afg‘onistondagi vaziyatni tartibga solishdagi muhim va o‘zgarmas rolini yana bir bor tasdiqlab, O‘zbekiston tomonining Afg‘onistonni ijtimoiy-iqtisodiy va infratuzilmaviy tiklashga qo‘shgan hissasi xalqaro hamjamiyat tomonidan e’tirof etilganidan dalolat berishi ta’kidlandi.

YuNAMA rahbari Toshkent forumi jahon hamjamiyatining asosiy talablarini afg‘on hukumati tomonidan bajarilishi bo‘yicha samarali xalqaro muloqotni yo‘lga qo‘yish uchun muhim platforma bo‘lganini ta’kidladi.