Qoʻshimcha funksionallar
-
Tungi ko‘rinish
WADA komissiyasi sobiq rahbari RF va Belarus sportchilari musobaqalardan chetlashtirilganiga qarshi chiqdi
Rossiya sportidagi doping bo‘yicha WADA komissiyasining sobiq rahbari RF va Belarus sportchilarining xalqaro musobaqalarda ishtirok etishiga ruxsat berish tarafdori ekanini aytdi. Sportchilarga nisbatan hozirgi munosabat «adolatsiz», deydi Maklaren.
Kanadalik huquq professori, Butunjahon antidoping agentligi (WADA)ning Rossiya davlat organlarining 2014 yilda Sochida bo‘lib o‘tgan Olimpiada o‘yinlaridagi doping firibgarliklari haqidagi ayblovlarni tekshirish komissiyasi sobiq rahbari Richard Maklaren Rossiya va Belarus sportchilarining xalqaro musobaqalarda ishtirok etishdan chetlatilganiga qarshi chiqdi. 14 avgust, yakshanba kuni Germaniyaning ARD jamoat telekanali sport muharririyati Sporschau’ning yurist bilan suhbatidan parchalarni o‘z saytida e’lon qildi.
«Bu sportchilarga nisbatan bo‘layotgan hozirgi munosabatlar adolatsizlikdir», - dedi Maklaren.
Kanadalik sportchilar o‘z mamlakatlari siyosati uchun mas’ul bo‘layotganini tanqid qildi: «Sportchilar bu mojaroning tashabbuskori bo‘lmagan va uning uchun javobgar emas. Bu ularning musobaqalarda yana ishtirok etishiga ruxsat berish uchun ikkita yaxshi sababdir».
Richard Maklaren bir qator rossiyalik va belaruslik sportchilar o‘z huquqlarini himoya qilish uchun xalqaro Sport arbitraj sudiga (CAS) murojaat qilishini kutmoqda. «Agar CAS sportchilar foydasiga qaror qilsa, federatsiyalar ularga yana musobaqalarda qatnashishiga ruxsat berishga majbur bo‘ladi», dedi u. Yurist ruslar va belaruslarning suddagi imkoniyatlari haqida gapirishni istamadi va ularning ishlari bo‘yicha qarorlar har qanday bo‘lishi mumkinligini qo‘shimcha qildi.
Sochi olimpiadasidan so‘ng Richard Maklaren Butunjahon antidoping agentligi tomonidan Rossiya sportidagi dopingni tekshirish bo‘yicha mustaqil komissiyaga rahbar etib tayinlangan edi. 2016 yilda hisobotning ikki qismi nashr etildi. Hisobotda aytilishicha, 30 ta sport turi bo‘yicha turli turnirlarda mingdan ortiq sportchi doping namunalari bilan bog‘liq firibgarlik ishlariga jalb qilingan. Bundan tashqari, Maklaren Rossiyada doping namunalarini manipulyatsiya qiladigan va sportchilarni qamrab oluvchi davlat tizimi mavjudligini aytdi. Keyinchalik Maklaren Rossiya futbolida doping qo‘llanilishi haqida gapirdi. Hisobot e’lon qilinganidan so‘ng rossiyalik sportchilar va paralimpiyachilarga Rio-de-Janeyrodagi olimpiada o‘yinlarida qatnashish taqiqlandi.
Ukrainada Rossiya urushi boshlanganidan keyin Xalqaro olimpiya qo‘mitasi (XOQ) jahon sport federatsiyalariga rossiyalik va belaruslik sportchilarni xalqaro musobaqalardan chetlashtirishni tavsiya qildi. Deyarli barcha federatsiyalar tavsiyalarga amal qilishdi.
