YeI va Kreml o‘rtasida norasmiy aloqalar bo‘lgani xabar qilindi

Bloomberg manbalarining ma’lum qilishicha, Yevropa kengashi raisi Antoniu Koshtaning maslahatchisi Kremldagi yuqori lavozimli rasmiylardan biri bilan ikki marta telefon orqali suhbatlashgan. Ushbu muloqotlar kelajakda Rossiya bilan mazmunli muzokaralar o‘tkazish uchun zamin yaratish maqsadida tashkil etilgani aytilmoqda.

Biroq agentlik mazkur suhbatlar qachon bo‘lib o‘tgani va ularda aynan qaysi shaxslar ishtirok etganiga aniqlik kiritmagan.

Xabarda qayd etilishicha, Yevropa Ittifoqi rahbariyati Rossiya bilan ehtimoliy muzokaralarga tayyorgarlik ko‘rishni bir necha oy oldin boshlagan. Xususan, may oyi boshida Antoniu Koshta Yevropa Ittifoqi davlatlari yetakchilari bilan Rossiya bilan muloqot uchun qanday format va qanday masalalar muhokama qilinishi lozimligini muhokama qilayotganini bildirgan edi.

O‘shanda u Rossiya prezidenti Vladimir Putin bilan muzokaralar o‘tkazish imkoniyati mavjudligini ham ta’kidlagan.

Bloomberg ma’lumotlariga ko‘ra, Rossiyani tinchlik muzokaralari jarayoniga jalb qilish strategiyasi Yevropa iqtisodiyotining uchta yirik markazi — Germaniya, Fransiya va Buyuk Britaniya tomonidan ham muhokama qilinmoqda. Nashrning yozishicha, bu jarayon Ukraina prezidenti Volodimir Zelenskiy bilan kelishilgan holda olib borilmoqda.

Yevropa davlatlari vakillari fikricha, frontda Rossiya armiyasi oldida turgan qiyinchiliklar, Ukraina tomonidan Rossiya hududlariga uyushtirilayotgan zarbalarning kuchayishi hamda iqtisodiy bosimning ortishi Moskvani muzokaralar stoliga o‘tirishga undashi mumkin.

Ayni paytda na Yevropa kengashi raisi matbuot xizmati, na Kreml matbuot kotibi Dmitriy Peskov Bloomberg'ning bu boradagi so‘rovlariga rasmiy izoh bergan.

Ekspertlar ta’kidlashicha, agar mazkur muloqotlar haqiqatdan ham amalga oshirilgan bo‘lsa, bu Yevropa Ittifoqining Ukrainadagi mojaroni diplomatik yo‘l bilan hal etish bo‘yicha yangi sa’y-harakatlari sifatida baholanishi mumkin.