Putin qurolli kuchlar harbiy xizmatchilari sonini oshirish to‘g‘risidagi farmonni imzoladi

Rossiya prezidenti Vladimir Putin mamlakat qurolli kuchlaridagi shtatlar sonini 2 mln 39 ming 758 nafarga yetkazish to‘g‘risidagi farmonni imzoladi. Ularning 1 mln 150 ming 628 nafarini harbiy xizmatchilar tashkil qiladi.

Qayd etilishicha, farmon 2023 yil 1 yanvardan kuchga kiradi.

Rossiya qurolli kuchlari xizmatchilari soni oxirgi marta 2017 yilda belgilangandi. O‘shanda ularning soni 1 mln 902 ming 758 nafar bo‘lib, 1 mln 13 ming 628 nafari harbiylar edi. Yangi farmon bilan harbiylar soni 137 ming kishiga oshiriladi (+13,5 foiz).  

15 iyul kuni Rossiyada qurolli kuchlarga bahorgi chaqiruv yakuniga yetdi. Bahorgi chaqiruv davrida mudofaa vaziri Sergey Shoygu armiyaga yangi chaqirilganlar hech qanday qaynoq nuqtalarga yuborilmasligiga va’da bergandi.

Kuzgi chaqiruv 1 oktyabrda boshlanadi va 31 dekabrgacha davom etadi.