Chegaradan 18,6 ming dollarni yashirincha olib chiqmoqchi bo‘lgan xorijlikning 10 yil O‘zbekistonga kirishiga taqiq qo‘yildi

Samarqand viloyati Bojxona boshqarmasi axborot xizmatining xabar berishicha, 2022 yil 29 aprel kuni “Jartepa” chegara bojxona postida “yashil” yo‘lak orqali harakatlanib, qo‘shni davlatga chiqib ketmoqchi bo‘lgan xorijiy davlat fuqarosini bojxona xodimlari bojxona nazoratidan o‘tkazishgan.

Tekshiruv davomida chet ellik bojxona deklaratsiyasiga kiritmasdan, tanasining bel qismiga o‘ragan holda, bojxona nazoratidan yashirib, jami 207 944 280 so‘m ekvivalentidagi 18 600 AQSh dollarini olib ketayotgani aniqlangan.

Holat yuzasidan sudning hukmi bilan Jinoyat kodeksining tegishli moddalariga muvofiq, sudlanuvchiga BHMning 100 baravari miqdorida jarima jazosi tayinlangan.

Shuningdek, 18 600 AQSh dollari davlat foydasiga musodara qilingan hamda sudlanuvchi 10 yil muddatga O‘zbekiston Respublikasi hududiga kirishi cheklangan.

Avvalroq, DXX Namangan viloyatida O‘zbekistondan 2 mln dollardan ortiq valutani olib chiqib ketayotganlarni ushlagandi.