COVID-19: Rossiyada olti oy ichida yangi holatlarning maksimal soni qayd etildi

Rossiyada bir sutka davomida 52 106 ta yangi koronavirus infeksiyasi holati aniqlandi, bu 9 martdan beri eng ko‘p ko‘rsatkichdir (58 675 ta infeksiya). Yangi statistika 9 sentabr, juma kuni infeksiyani nazorat qilish bo‘yicha operativ shtabda e’lon qilindi.

Ayni paytdagi ko‘rsatkich avvalgi kunga nisbatan 2,9 foizga ko‘p. Kasallik darajasi ketma-ket ikkinchi kun 50 mingdan yuqori bo‘lib turibdi.

Pandemiya boshlangandan beri Rossiyada jami 19 960 295 ta infeksiya holati aniqlangan. Bir kunda 96 kishi COVID-19 bilan vafot etdi (19 maydan beri maksimal raqam). Umuman olganda, epidemiya boshlanganidan buyon 385 165 kishining o‘limi rasman aniqlangan.

Rossiya sog‘liqni saqlash vaziri Mixail Murashko 2 sentabr kuni uning idorasi «kasallanish darajasining oshishi mumkinligini bashorat qilayotganini» aytgandi. Murashkoning so‘zlariga ko‘ra, bu o‘quv yilining boshlanishi, aholining shahar chetidan shaharlarga qaytishi bilan bog‘liq. «Albatta, faqat shaxsiy xavfsizlik choralarini kuchaytirish kerak», — deya qo‘shimcha qildi vazir. 

Shu bilan birga, 8 sentabr kuni Germaniya Bundestagi epidemiologik himoya to‘g‘risidagi qonunga o‘zgartirishlarni ma’qulladi, uning maqsadi nemis aholisini kuz va qish oylarida SARS-CoV-2 koronavirusidan himoya qilishni kuchaytirishdan iborat. Yangiliklarni qabul qilish uchun 386 nafar deputat ovoz berdi, 313 nafar deputat qarshi, yana uch nafar deputat betaraf qoldi.  

Tuzatishlar uzoq masofali poyezdlar, qariyalar uyi va tibbiyot muassasalarida majburiy niqob kiyishni talab qiladi. Davolanish uchun kasalxonada yoki qariyalar uyida yotgan qarindoshlarinikiga borganda, COVID-19 testining salbiy natijasini ko‘rsatish kerak. Shu bilan birga, niqob rejimi samolyotlarga taalluqli emas.