Toshkent tibbiyot akademiyasida “Talabalikka bag‘ishlov - 2022” tadbiri o‘tkazildi

26 sentabr kuni poytaxtdagi Kinochilar  saroyida Toshkent tibbiyot akademiyasi 1-kurs talabalarining “Talabalikka bag‘ishlov - 2022” tadbiri  bo‘lib o‘tdi. Mazkur tadbir 1 oktabr – Ustoz va murabbiylar kuni munosabati bilan tashkil etildi. Bugungi tadbir oldidan talabalar uchun maxsus ko‘rgazma tashkil etildi.

Akademiya rektori Alisher Shodmonov tomonidan ochib berilgan bayram tadbirida barcha faxriy professor-o‘qituvchilar ishtirok etishdi. Tadbirda ko‘p yillardan beri samarali faoliyat yuritib kelayotgan ustoz-murabbiylar munosib taqdirlanishdi.

 “Bizning akademiya nafaqat O‘zbekistonda, balki O‘rta Osiyodagi tibbiyot oliygohlari orasida yetakchi hisoblanadi. Chunki boshqa barcha tibbiyot o‘quv ta’lim muassasalarining ildizi Toshkent tibbiyot akademiyasiga borib taqaladi. Bu ulug‘ dargohda yuzlab ulug‘ ustozlar o‘z bilimlarini talabalarga singdirib, xalqimiz salomatligi yo‘lida xizmat qilishgan. Bugun talabalarga ham shu yo‘lni davom ettirishlarini tilaymiz”,- dedi Toshkent tibbiyot akademiyasi professori Abdug‘affor Gadoyev.

Toshkent tibbiyot akademiyasi 1919 yilda Toshkent tibbiyot instituti sifatida Toshkent shahridagi O‘rta Osiyo universitetining tibbiy fakulteti negizida tashkil etilgan.

O‘zbekiston Respublikasidagi yetakchi tibbiyot ta’lim muassasasi bo‘lgan Toshkent tibbiyot akademiyasi yurtimizdagi eng yaxshi tibbiyot OTM reytingi bo‘yicha 1-o‘rinni, O‘zbekistonning barcha OTM orasida 6-o‘rinni egallaydi. Bu yil akademiya talabalari safi 2300 nafarga kengaydi.

 Ayni paytda akademiyada davolash, tibbiy pedagogika, tibbiy-profilaktika, tibbiy-biologiya, harbiy-tibbiy va oliy hamshiralik ishi bo‘yicha fakultetlar tashkil etilgan bo‘lib, ularda 5000dan ortiq talabalar tahsil olishadi.

Magistrlarga ta’lim berish 49ta, tor doiradagi mutaxassis shifokorlarni tayyorlash esa klinik ordinaturaning 38ta yo‘nalishida amalga oshiriladi.