“Ayti sohasini soyadan olib chiqishga qiynalganmiz” – Sherzod Shermatov

“Ayti kompaniyalarning xarajatlari katta edi. Aytishniklar uyida o‘tirib ishlardi, loyihalarimizni ko‘tarib qancha tashkilotlarga borganmiz, o‘tmagan”, – deydi AKT vaziri Sherzod Shermatov. U “Veon” kompaniyasi boshqa davlatlardagi razrabotchiklarni olib kelib, O‘zbekistonni autsorsing markaziga aylantirmoqchiligini ma’lum qildi.

AKT vaziri Sherzod Shermatov Xalqaro press klub sessiyasida 2017 yildan keyin ayti parklarni ishga tushirish borasidagi loyihalari o‘tmagani haqida gapirdi.

“2017 yildan keyingi davrni tahlil qilish kerak. Ayti sohasini soyadan olib chiqishga qiynalganmiz. To‘g‘ri, bolalar uyidan o‘tirib yoki autsorsingda ishlagan. Ayti kompaniyalarning xarajatlari katta edi. Bu eng katta xarajat oylikka bog‘liq edi – soliqlar hisobiga va boshqa xarajatlar. O‘sha paytda har xil tashkilotlarga borganmiz, lekin loyihalarimiz o‘tmagan.

2017 yilda prezident oldida (IT parklarga oid) farmon loyihasini taqdimot qilganmiz. Belarus, Hindiston tajribasini ko‘rdik, shunaqa ish qilmoqchimiz desak, “budjetdan pul, imtiyozli kredit yoki subsidiyalar so‘ramayapsizlar-ku, muammo nimada, buni qilamiz”, deganlar. Shundan keyin farmon qabul qilindi”, – deydi vazir.

U telekommunikatsiya sohasida 100 mln dollarlik eksportga chiqilgani, biroq telekommunikatsiyalar eksporti bundan bu yog‘iga o‘sishi qiyinligini ta’kidladi. 

“Chunki telefon muloqoti kamayib, ayti eksporti telekommunikatsiya eksportidan oshadi.

Mobil operatorlar va pochtada ishlayotgan xodimlarga qarasak, frilanser bo‘lib ishlayotgan aytishniklar soni ko‘p”, – deydi Shermatov.

Vazirning so‘zlariga ko‘ra, prezident O‘zbekistonni ayti xabga aylantirish vazifasini qo‘ygan. Joriy yilning o‘zida yirik xalqaro ayti kompaniyalarini O‘zbekistonga jalb qilishga qaratilgan takliflarni qo‘llab-quvvatlagan.

“Xalqaro doirada O‘zbekiston desa hali ko‘pchilik tanimaydi, u yerda haliyam eshakda yurishibdi degan fikr bor, afsuski. Lekin xalqaro kompaniyalar o‘zi kelib ko‘ryapti, Meta kompaniyasining O‘zbekistonga mas’ul rahbari kelganda ko‘rib hayron qoldi.

Prezident bizga katta planka qo‘yganlar, biz 100 mln dollarlik eksportga chiqdik deyapmiz, lekin mlrd dollar autsorsingga chiqish vazifasini qo‘ygan edilar…

“Veon” O‘zbekistonga boshqa davlatlardagi razrabotchiklarni olib kelib, mamlakatimizni autsorsing markaziga aylantirmoqchi”.