Zelenskiy: Annexia erkin xalqlar tomonidan tan olinmaydi

«Birlashgan millatlar tashkiloti Bosh assambleyasining «Ukrainaning hududiy yaxlitligi: BMT nizomi tamoyillarini himoya qilish» tarixiy rezolyutsiyasini qo‘llab-quvvatlagan barcha 143 davlatga rahmat. Dunyo o‘z so‘zini aytdi: Rossiyaning annexia qilishga urinishi befoyda va erkin xalqlar tomonidan hech qachon tan olinmaydi», — deb yozdi Ukraina prezidenti Twitter'dagi mikroblogida. 

Uning qo‘shimcha qilishicha, Ukraina o‘zining barcha yerlarini qaytarib oladi.

Bundan oldin BMT Bosh assambleyasi Rossiyaning Ukraina to‘rtta hududini annexia qilganini qoralovchi rezolyutsiyani ko‘pchilik ovoz bilan qabul qildi. 

«Ukrainaning hududiy yaxlitligi. BMT nizomi tamoyillarini himoya qilish» hujjati o‘zini o‘zi mustaqil deb e’lon qilgan «DXR», «LXR», shuningdek, Rossiya tomonidan bosib olingan Zaporijjya va Xerson oblastlari hududlarida o‘tkazilgan «referendumlar»ni tan olmaydi. 

Ta’kidlanishicha, soxta referendumlar yuridik kuchga ega emas va bu hududlarning maqomini o‘zgartirish, jumladan, Rossiyaga qo‘shib olish uchun asos bo‘la olmaydi.

Rossiyaning harakatlarini qoralovchi rezolyutsiyani 143 davlat vakillari qo‘llab-quvvatladi, 35 tasi betaraf qoldi. Yana besh davlat – Rossiya, Belarus, Suriya, Shimoliy Koreya va Nikaragua bunga qarshi chiqdi.