O‘zbekiston | 09:13 / 14.10.2022
6005
2 daqiqa o‘qiladi

La Skalada O‘zbekiston teatrlari uchun kadrlar tayyorlash yo‘lga qo‘yilishi mumkin

Italiyadagi La Skala teatrining O‘zbekistonga ijodiy safarini tashkil etish imkoniyatlari muhokama qilindi.

Foto: Dunyo

O‘zbekiston Madaniyat vazirligi delegatsiyasi madaniyat va san’at sohasidagi ilg‘or tajribalarni o‘rganish maqsadida Milan shahriga tashrif buyurdi, deb xabar bermoqda «Dunyo».

Safar doirasida O‘zbekiston elchixonasi tomonidan «Italiya-O‘zbekiston» Savdo-sanoat palatasi (CIUZ) ko‘magida dunyodagi eng nufuzli teatrlardan biri – La Skala opera teatri, uning akademiyasi, balet maktabi va ijodiy jamoa rahbariyati bilan uchrashuvlar tashkil etildi. 

La Skala teatri akademiyasi 4 ta maktab-fakultetdan tashkil topgan. Ular musiqa, raqs, sahna san’ati va boshqaruv maktablaridan iborat. Bu yerda har yili dunyo turli burchaklaridan kelgan mingdan ortiq talaba (taxminan 500 nafari professional kurslarda va 500 nafari boshlang‘ich kurslarda) 30 ta dastur bo‘yicha tahsil oladi. 

O‘qitish jarayoni mashg‘ulot va amaliyotga asoslangan. Talabalar taniqli rejissyorlar, xonandalar, dirijyor va raqqosalar bilan birgalikda konsertlar, spektakllar, ko‘rgazma va seminarlarda muntazam qatnashadi. O‘qish va malaka oshirishda muvaffaqiyatga erishgan bitiruvchilar bilan La Skala teatrida ishlash uchun shartnomalar tuziladi. Akademiya direktori Luiza Vinchi aytishicha, ta’lim muassasasi har yili talabalar uchun 600 ming yevro grant ajratadi.

Muzokaralar chog‘ida O‘zbekiston teatrlari uchun kadrlar tayyorlash bo‘yicha hamkorlikni yo‘lga qo‘yishdan manfaatdorlik bildirildi.

La Skala teatri akademiyasi, O‘zbekistonning tegishli teatri va «Italiya-O‘zbekiston» Savdo-sanoat palatasi o‘rtasida hamkorlik to‘g‘risida shartnoma tuzishga kelishib olindi.

Uchrashuv yakunida tomonlar hamkorlikda ishlashga tayyor ekanini tasdiqladi. La Skala teatrining O‘zbekistonga gastrol safarini tashkil etish masalasi ham muhokama qilindi.

Mavzuga oid