Davlat budjeti ijrosi to‘g‘risidagi hisobotlar parlamentga yuborilishidan oldin muhokamaga qo‘yilishi to‘xtatiladi

“Budjet jarayoni takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi e’lon qilindi.

Qonun loyihasi 4 ta moddadan iborat bo‘lib, Ma’muriy javobgarlik to‘g‘risidagi kodeks va Budjet kodeksiga tegishli o‘zgartirish va qo‘shimchalar kiritishni nazarda tutadi.

29- va 97-moddalarda davlat budjeti va davlat maqsadli jamg‘armalari budjetlari ijrosi to‘g‘risidagi hisobotlar Oliy Majlis palatalariga yuborilishidan oldin ular jamoatchilik muhokamasiga qo‘yilishi amaliyotiga chek qo‘yilmoqda.

50- va 51-moddalarda davlat budjeti mablag‘lari hisobidan rezident-yuridik shaxslarga berilgan budjet ssudalari, kredit liniyalari va chet davlatlarga ajratilgan kreditlar bo‘yicha qaytariladigan asosiy qarz summasi daromad sifatida qabul qilinmasligi belgilanmoqda. 50-moddada davlat budjetiga yo‘naltiriladigan davlat bojlari davlat budjeti daromadlari shakllantirish manbasi sifatida kiritilmoqda.

52-moddada mobil aloqa xizmatlari, tamaki va alkogol mahsulotlari uchun aksiz solig‘i bo‘yicha tushumlar tegishincha moliya yilidan oldingi yil 1 iyul holatiga ko‘ra Qoraqalpog‘iston, viloyatlar va Toshkent shahri aholisi soni respublika aholisi sonidagi ulushiga muvofiq Qoraqalpog‘iston respublika budjetiga, viloyatlar budjetlariga va Toshkent shahar budjetiga to‘liq hajmda o‘tkazilishi belgilanmoqda.