Har yili ov qilish uchun O‘zbekistonga keladigan BAAning Dubay amirligi taxti vorisi shayx Hamdan Ol Maktum ayni paytda Navoiy viloyatida. Valiahdning shaxsiy hayotini yoritib boradigan Twitter-sahifasida shayx Hamdan 17 oktabr Navoiy viloyatidagi Qizilqum cho‘lida o‘choq boshida turgan suratlar hamda video e’lon qilindi.
U Navoiy shahridan 50 kilometrcha uzoqlikdagi cho‘l hududida joylashgan “Amirliklarning yo‘rg‘a tuvaloqni asrash markazi”da an’anaviy tarzda ov qilib keladi. 300 gektar yer maydonga ega ushbu markaz 2008 yilning aprel oyida BAA vitse-prezidenti, Dubay amiri Shayx Muhammad ibn Roshid Ol Maktum tashabbusi bilan tashkil etilgan.
O‘tgan yili ushbu markazda yetishtirilgan 1070 ta yo‘rg‘a tuvaloq viloyatning Tomdi, Uchquduq va Konimex tumanlari cho‘l hududlarida yovvoyi tabiatga qo‘yib yuborilgandi.
Shahzoda Hamdan har yili ushbu hududga oktabr oyida tuvaloq ovlash uchun tashrif buyuradi. Avvalroq Shayx Hamdanning O‘zbekiston prezidenti Shavkat Mirziyoyev oilasi vakillarining ham mehmoni bo‘lgani hamda Navoiyda lochin bilan tuvaloq ovlagan videosini ulashgani haqida xabar qilgan edik.
