Jizzaxda fuqaroning montaj qilingan fotosuratlarini internetda tarqatish bilan qo‘rqitib pul talab qilgan ayol ushlandi

Jizzax viloyati IIb axborot xizmatining xabar berishicha, Sharof Rashidov tumanida yashovchi shaxs joriy yil bahorda G‘allaorol tumanida ro‘yxatda turib, Zafarobod tumanida yashovchi ayol bilan tanishgan.

Ular iyul oyigacha yaqin aloqada bo‘lib kelishadi va keyin aloqalar uziladi. Biroz o‘tib ayol erkakka yana uchrashishni taklif qiladi. Rad javobini olgach qing‘ir ishga qo‘l uradi.

Ayol yigitning ijtimoiy tarmoqdagi sahifasidan fotosuratlarini yuklab oladi va ularni montaj qiladi. So‘ng fotosuratlarni ijtimoiy tarmoqlarda tarqatish bilan qo‘rqitib, undan 5 million so‘m talab qiladi.

Shundan so‘ng erkak ichki ishlar organlariga murojaat qiladi. IIB xodimlari tomonidan o‘tkazilgan tezkor tadbir davomida ayol erkakdan 5 million so‘mni olayotgan vaqtida ashyoviy dalillar bilan ushlangan.

Qayd etilishicha, holat yuzasidan jinoyat ishi qo‘zg‘atilgan, hozirda tergov harakatlari olib borilmoqda.

Avvalroq, Jizzaxda tanish ayolning intim videosini ijtimoiy tarmoqlarda tarqatishini aytib pul olgan shaxslar ushlangandi.