Farg‘ona viloyati IIB tomonidan tovlamachilikda ayblanib, qamoqqa olingan Mahliyo Umarovani qamoqda ushlab turish muddati 5 oyga qadar uzaytirildi. Bu qamoqda ushlab turish muddati hali tugamay turib amalga oshirildi. Jinoyat ishi tergovi Farg‘onadan avvaliga Toshkent shahri Mirobod tumani IIBga, so‘ngra Toshkent shahar IIBBga o‘tkazilgan. Ammo qamoqda saqlanayotgan M.Umarova hamon Farg‘ona viloyati IIBda qolmoqda.
Jinoyat ishlari bo‘yicha Farg‘ona shahar sudi tovlamachilikda ayblanayotgan Mahliyo Umarovani qamoqda ushlab turish muddatini uzaytirdi. Sudning bu boradagi hujjati 2025 yil 10 noyabr kuni chiqarildi.
Jinoyat ishlari bo‘yicha Farg‘ona shahar sudi tomonidan Mahliyo Umarovaning yaqin qarindoshlariga jo‘natilgan xabarnomada keltirilishicha, uni qamoqda saqlash muddati 2025 yil 10 noyabrdan 5 oyga qadar uzaytirilgan.
Mahliyo Umarovaga Jinoyat ishlari bo‘yicha Farg‘ona shahar sudining 2025 yil 22 avgustdagi ajrimi bilan qamoqqa olish tarzidagi ehtiyot chorasi qo‘llangandi.
Jinoyat-protsessual kodeksining 245-moddasiga ko‘ra, jinoyatlar tergov qilinayotganda qamoqda saqlab turish muddati ko‘pi bilan uch oyni tashkil etadi. Ushbu tartib bo‘yicha Umarovani qamoqda saqlab turish muddati 2025 yil 22 noyabr kuni tugashi kerak edi. Ammo ushbu muddat hali tugamasdan turib ayolni qamoqda saqlash muddati uzaytirilgan.
Qamoqda saqlab turishning belgilangan uch oylik muddatini besh oygacha uzaytirish imkoni Qoraqalpog‘iston Respublikasi prokurori yoki viloyat, Toshkent shahar prokurori va ularga tenglashtirilgan prokurorlarning iltimosnomasiga binoan sud tomonidan ko‘rib chiqiladi.
Mahliyo Umarova va uning opasi Mohinur Xoliqnazarovaga nisbatan tovlamachilik bo‘yicha jinoyat ishi qo‘zg‘atilgan. Opa-singil fuqaro Nazokat Shukurovani “mashinada Quva tumani hududida joylashgan “Karkidon” suv ombori yaqinidagi ovloq joyga olib borib, mashina ichida zo‘rlik ishlatib, uyini farzandlariga qo‘shib yoqib yuborish bilan qo‘rqitgan holda pul talab qilgan”likda gumonlanmoqda.
Avvalroq Kun.uz holat yuzasidan surishtiruv o‘tkazgandi. Unda Mohinur Xoliqnazarova bu jinoyat ishi Farg‘ona shahar ichki ishlar boshqarmasi boshlig‘i Alisher Ashurovning adovati tufayli uyushtirilganini bildirgandi.
