O‘zbekiston-Rossiya III ta’lim forumi - hamkorlikni jadallashtirishda muhim platforma

26-27 oktabr kunlari Samarqand shahrida o‘tkazilgan O‘zbekiston-Rossiya uchinchi ta’lim forumida ikki davlat tomonidan 200 nafardan ortiq oliy ta’lim muassasalari rahbarlari, ishlab chiqarish kompaniyalari vakillari, vazirlik va idoralar mas’ullari qatorida Samarqand davlat tibbiyot universiteti rahbariyati ham ishtirok etdi.

Forumda mamlakatimiz oliy o‘quv yurtlari bilan Rossiya ishlab chiqarish sektorlari o‘rtasida integratsiyani yo‘lga qo‘yish, muhandislik, energetika, kimyo sanoati sohalarida kadrlar tayyorlash, malaka oshirish va ilmiy faoliyatdagi hamkorlikni rivojlantirish masalalari muhokama qilindi.

Forum yakunida 100 ga yaqin hamkorlik shartnomasi imzolandi. Shu jumladan Samarqand davlat tibbiyot universiteti tomonidan Rossiyaning bir qator oliygohlari va tashkilotlari bilan hamkorlik aloqalarini o‘rnatish borasida samarali muzokaralar olib borildi.

Forum doirasida Samarqand davlat tibbiyot universiteti rektori Jasur Rizayev Sankt-Peterburg gubernatori o‘rinbosari Oleg Ergashev, boshchiligidagi delegatsiyani qabul qildi.

Uchrashuv davomida ilmiy va davolash sohalarida hamkorlikni yo‘lga qo‘yish va hamkorlik memorandumini imzolash haqida kelishib olindi.

Shu kuni Samarqand davlat tibbiyot universiteti va I.Kant nomidagi Baltika federal universiteti o‘rtasida hamkorlik memorandumi hamda “Tibbiyot sohasida sun’iy intellektni qo‘llashni rivojlantirish” va “Jigarning infeksion kasalliklarida tibbiyot texnologiyalarini shaxsiylashtirishni o‘rganishga yo‘naltirish” sohalarida kelishuv shartnomalari imzolandi.

Shuningdek, 28 oktyabr kuni Jasur Rizayev hamda B.B. Gorodovinkov nomidagi Qalmiq davlat universiteti (RF) rektori Badma Salayev o‘rtasida uchrashuv bo‘lib o‘tdi.

Unda ikki universitetning ilmiy va davolash sohalarida hamkorlikni yo‘lga qo‘yish bo‘yicha hamkorlik memorandumi imzolandi.

Mazkur hujjatlarda qo‘shma ilmiy tadqiqotlarni muvofiqlashtiruvchi xalqaro ishchi guruh tuzish, shuningdek yangi tibbiy texnologiyalardan foydalanish samaradorligini monitoring qilish va baholash maqsadida yuqumli jigar kasalliklarining milliy nozologik reyestrini shakllantirish metodikasini ishlab chiqish, hamkorlikdagi tadbirlarni o‘tkazish, ta’limning barcha bosqichlari uchun o‘quv amaliyotlari, o‘qituvchilar almashinuvi, malaka oshirish kurslari va hamkorlikda maqolalar chop etish, tibbiyot sohasida sun’iy intellekt texnologiyalarini ishlab chiqish loyihalarini amalga oshirish ko‘zda tutilgan.

Imzolangan xalqaro shartnomalar Samarqand davlat tibbiyot universitetida o‘quv va ilmiy jarayonni jadallashtirish, innovatsion tibbiyotni raqamlashtirish hamda amaliy sog‘liqni saqlash sohalarini yanada rivojlantirishga poydevor yaratadi.

Reklama