Qoʻshimcha funksionallar
-
Tungi ko‘rinish
London Ukrainaga yana 1000 ta «yer-havo» sinfidagi raketalarni yetkazib beradi
Ukrainaga raketalarni yetkazib berish mamlakat infratuzilmasini Rossiya havo hujumlaridan himoya qilishga yordam beradi, dedi mudofaa vaziri Londonda. Ular qanotli raketalarni ham, dronlarni ham urib tushirishga qodir.
Buyuk Britaniya Ukrainaga yana 1000 ga yaqin «yer-havo» sinfidagi raketalar va ularni uchirish uchun moslamalar yetkazib beradi, deb ma’lum qildi Britaniya mudofaa vaziri Ben Uolles 9 noyabr, chorshanba kuni. Ular Rossiyaning qanotli raketalarini ham, dronlarini ham urib tushirishga qodir.
«Yana yuzlab «yer-havo» raketalarining topshirilishi Ukrainaning Rossiya agressiyasidan mudofaasini qo‘llab-quvvatlashimizni davom ettiradi va Ukrainaga (Rossiya) muhim milliy infratuzilmaga noqonuniy hujumlari tahdidiga qarshi turishga yordam beradi», — deya Uollesning so‘zlaridan iqtibos keltirgan Buyuk Britaniya hukumati veb-sayti.
Shu kuni mudofaa vaziri Buyuk Britaniya va hamkor mamlakatlardan kelgan instruktorlar 7400 dan ortiq ukrainalik askarni tayyorlayotgan ikkita o‘quv markaziga tashrif buyurdi. Uollesga NATO bosh kotibi Yyens Stoltenberg va Buyuk Britaniya bilan birgalikda Birlashgan ekspeditsiya kuchlari (JEF)ni tashkil etgan Daniya, Islandiya, Latviya, Litva, Niderlandiya, Norvegiya, Finlyandiya, Shvetsiya va Estoniya mudofaa vazirlari hamrohlik qildi.
Oktabr oyida Rossiya Ukraina hududini ommaviy o‘qqa tuta boshladi. 1 noyabr kuni prezident Zelenskiy ushbu zarbalar natijasida mamlakat energetika infratuzilmasining 40 foizga yaqini zarar ko‘rganini aytdi. Kiyev nafaqat G7 davlatlaridan, balki Isroildan ham raketaga qarshi mudofaa tizimini mustahkamlashda yordam so‘ramoqda.
G‘arb davlatlaridan bunday yetkazib berish allaqachon boshlangan: 11 oktabr kuni Germaniya Ukrainaga birinchi IRIS-T zenit tizimini topshirganligi ma’lum bo‘ldi, uning raketalari samolyotlar, vertolyotlar va raketalarni 40 kmgacha masofada va 20 kmgacha balandlikda urib tushirishga qodir. 7 noyabr kuni esa Ukraina mudofaa vaziri Oleksiy Reznikov mamlakatga NASAMS va Aspide havo mudofaa tizimlari yetib kelganini, bu esa «Ukraina osmonini xavfsizroq qilishini» aytdi. Shu bilan birga u Norvegiya, Ispaniya va AQShga minnatdorchilik bildirdi.
