Bu haqda Turkiy davlatlar tashkiloti sammiti doirasidagi yig‘ilishda Xalqaro Turkiy Akademiya prezidenti vazifasini bajaruvchi Fuzuli Majidli ma’lumot bergan.
10 noyabr kuni Xalqaro Turkiy Akademiya prezidenti vazifasini bajaruvchi Fuzuli Majidli Turkiy davlatlar tashkiloti sammiti doirasida Tashqi ishlar vazirlarining yig‘ilishida ishtirok etdi. Bu haqda Kun.uz’ga Innovatsion rivojlanish vazirligi matbuot xizmati xabar berdi.
Yig‘ilishda so‘zga chiqqan Fuzuli Majidli qardosh mamlakatlar o‘rtasida diplomatik munosabatlar, ilm-fan va ta’lim sohasidagi aloqalar rivojlanayotgani haqida gapirgan.
Tadbir davomida akademiya rahbari Mo‘g‘ulistonda Xalqaro Turkiy akademiya tomonidan olib borilgan arxeologik qazilma ishlari natijasida Ko‘kturk davriga oid yodgorlik majmuasi va yozuvi topilganini ham ma’lum qilgan.
«Ushbu majmua Qutlug‘ xoqon sharafiga o‘rnatilgan bo‘lib, u O‘rxun yodgorliklari topilganidan keyin so‘nggi 130 yil ichida turkiy dunyo uchun eng muhim kashfiyot sifatida qabul qilingan. Bu kashfiyotning eng muhim jihati shundaki, u «turk» so‘zi tilga olingan turk tilidagi birinchi yozma manba bo‘lib, hozirgacha bo‘lgani kabi xorijliklar tomonidan emas, balki turkiy olimlar tomonidan topilib, shifrlangan», – degan Fuzuli Majidli.
Ma’lum qilinishicha, yodgorlikning taqdimoti 15 dekabr – Xalqaro turkiy tillar kuni doirasida Parijda YuNESKO shafeligida o‘tkaziladi.
