Yevroparlament a’zolari Rossiya Federatsiyasini terrorizmga homiylik qiluvchi davlat sifatida tan olish to‘g‘risidagi rezolyutsiyani qabul qildi.
23 noyabr, chorshanba kuni Yevroparlament ko‘pchilik ovoz bilan Rossiyaning Ukrainaga qarshi harbiy agressiyasi tufayli Rossiyani terrorizmga homiylik qiluvchi davlat sifatida tan olish to‘g‘risidagi nizomni o‘z ichiga olgan rezolyutsiyani qabul qilishni yoqlab ovoz berdi.
Yevroparlament deputatlari Rossiyani terrorizmning homiysi deb e’lon qilish orqali Rossiya prezidenti Vladimir Putin va uning hukumati ushbu jinoyatlar uchun xalqaro tribunal oldida javobgarlikka tortilishiga yo‘l ochmoqchi, deya ta’kidlaydi YeP.
Rezolyutsiya yuridik majburiyat yuklash kuchiga ega emas. Yevropa Ittifoqining huquqiy bazasida tegishli qonunchilik mexanizmi mavjud emas.
Hozirgi vaqtda «terrorizm homiysi bo‘lgan davlat» atamasi faqat AQSh va Kanada qonunlarida mustahkamlangan. Amerika ro‘yxatida to‘rtta davlat bor: Suriya, Eron, Shimoliy Koreya va Kuba.
Bundan oldin Estoniya parlamenti Riygikogu Ukraina hududining noqonuniy annexia qilinishini qoralab, Rossiya rejimini terroristik deb e’lon qilgan bayonotni qabul qildi.
Rossiya Federatsiyasining Ukrainaga qarshi harbiy harakatlari va bosib olingan hududning noqonuniy annexia qilinishini keskin qoralagan Estoniya parlamenti Tallin tajovuz va soxta referendumlar natijasida Ukrainaning hududiy yaxlitligi buzilganini hech qachon tan olmasligini bildirdi.
Boltiqbo‘yi mamlakati parlamenti Rossiya rejimini terroristik, Rossiya Federatsiyasini esa «harakatlariga birgalikda qarshi turish kerak bo‘lgan terrorizm homiysi bo‘lgan davlat» deb e’lon qildi hamda xalqaro hamjamiyatni shunga o‘xshash deklaratsiyalarni qabul qilishga chaqirdi.
