Xorijda O‘zbekiston tarixi va madaniyatiga oid 9 mingdan ortiq osori-atiqalar aniqlandi

Bugungi kunga qadar 40 mamlakatda saqlanayotgan 9 mingdan ortiq uy-ro‘zg‘or buyumlari, arxeologik topilmalar, O‘zbekiston tarixi va madaniyatiga oid turli zargarlik buyumlari, qo‘lyozmalar, hujjatlar, to‘qimachilik buyumlari, cholg‘u asboblari haqida ma’lumotlar jamlandi.

2022 yilda xorijiy mamlakatlarda saqlanayotgan mamlakat tarixi va madaniyatiga oid qo‘lyozmalarni aniqlash, o‘rganish va nusxalarini yetkazib berish yo‘nalishida 330 ta madaniyat obekti – 173 ta qo‘lyozma, 157 ta muzey eksponatlari ilmiy tavsifi aniqlandi.

«O‘zbekistonga oid xorijdagi qo‘lyozma asarlar reyestri. Tom 1» nashr etildi. Monografik tadqiqot o‘zbek, ingliz va rus tillarida 1000 nusxada nashr etilib, respublika hamda 40ga yaqin davlatlar ilmiy va madaniy muassasalari va tashkilotlariga taqdim etildi. Bugungi kunga qadar mazkur reyestr 2-va 3- jildlari hamda Alisher Navoiyning Turkiyada saqlanayotgan «Badoye’ ul-bidoya» noyob qo‘lyozmasi ilmiy faksimilyasi nashrga tayyorlandi.

Agentlik xodimi, falsafa fanlari doktori, professor Roiq Bahodirov tashabbusi va rahbarligida «Habibullayev A. Ajdodlar merosi: AQShdagi qo‘lyozmalar» asari birinchi nashri 2022 yildagi yana bir ilmiy muvaffaqiyat bo‘ldi. Ushbu qo‘lyozmalar olimlarga tegishli bo‘lib, AQSh oliy o‘quv yurtlari kutubxonalarida saqlanadi.

Nashrda quyidagi 13 ta kutubxona fondlarini o‘rganish natijasida olingan ma’lumotlar o‘rin olgan bo‘lib, ularda 31 nafar olim tomonidan yozilgan 123 ta asar 556 ta qo‘lda yozilgan nusxalari ilmiy tavsiflari keltirilgan:

• Prinston universitetida - 278;
• Yyel universitetida - 140;
• Michigan universitetida (Ann Arbor shahri) - 51;
• Kongress kutubxonasi (Vashington, Kolumbiya okrugi) – 27;
• Kolumbiya universitetida - 16;
• Pensilvaniya universitetida - 15;
• Harvard universitetida (Kembrij) - 13;
• Milliy tibbiyot kutubxonasida (Vashington, Kolumbiya okrugi) - 11;
• Xaverford kolleji, Yuta universiteti, Stenford universiteti, Baltimor shahridagi Uolters badiiy muzeyi va Ayova universiteti kutubxonasidan olingan 1 tadan qo‘lyozma ma’lumotlari taqdim etilgan.