Samsung buklanadigan ekranli noutbuk ishlab chiqarmoqchi 

Janubiy Koreyaning The Elec nashri xabariga ko‘ra, Samsung Display 2023 yilda bozorga noutbuklar uchun 8,5 million dona OLED panelni yetkazib berishni rejalashtirmoqda. Komponentlarning katta qismi Asus kompaniyasiga, qolgan qismi Galaxy ceriyasidagi qurilmalarni ishlab chiqaruvchi Samsung MX bo‘limiga yetkazib beriladi. 

Shu tufayli, mualliflar Koreya kompaniyasi 2023 yilda o‘zining buklanadigan displeyli birinchi noutbukini taqdim etishini taxmin qilishgan. Qurilma 17,3 dyuymli OLED ekranga ega bo‘ladi. Buklangan holatda panel har biri 13,3 dyuymli ikkita qismdan iborat bo‘ladi. Mutaxassislarning fikricha, uning yarmidan displey sifatida, ikkinchisidan sensorli klaviatura sifatida foydalanish mumkin. 

Mutaxassislar bozorda bukiluvchan panellarga qiziqish ortib borayotganini qayd etishgan. Masalan, 2020 yilda Samsung Display noutbuklar uchun 960 ming dona, 2021 yilda 5 million dona, 2022 yilda deyarli 6 million dona OLED displey ishlab chiqargan. 

Avvalroq Samsung kompaniyasi smartfonlarni ishlab chiqish va ishlab chiqarish strategiyasini o‘zgartirgani ma’lum bo‘lgan edi. Bunda kompaniya Apple bilan raqobatlashish uchun qimmatbaho flagmanlarni chiqarishda tejamkorlikdan voz kechishni maqsad qilgan.